سنين مرِّت

كلمات الشاعرة … يامنه اليمنى
ـــــــــــــــــــــ
سنين مرت على عمرى
حاجات ياما بتوجعنى
قلوب حابَّة تضيَّعنى
وكل ما اقول خلاص راح افوق
بحور الوهم تخدعنى
وييجى العيد بأفراحه
وانا الأحزان تواعدنى
تهددنى بجرح جديد
يموت العيد
وانا لسه يادوب بافرح
وامدِّ الإيد وآخد حظى م الفرحة
ألاقيها سنين جارحه
وطارحه الشوك ف وجدانى
ويرجع قلبى وحدانى
يسحّ.. ينوح
ولا بيبوح
بآهه ساكنة شريانه
ك طير مدبوح
وبيفرفط حلاوة روح
وكل ما افوق
ألاقى النَّوة واخدانى وحدفانى
فى قلب الموج
يعافر قلبى من تانى
ياريت تغرق
تتوب تعشق
ضنانى العشق بكَّانى
حزينة حروفى جوايا
بتزرع خوفى وشقايا
ومين حاسس وجع قلبى
ده ماله حدود ولا نهاية
زرعت الودّ فى طريقى
حصدته
جفا وأسى وحرمان
طب العيب ياترى فينا
ولا العيب فيك يازمان
أيام وسنين وانا بضحك
وضحكى حزين كملامحى
وبانكش فى دروب روحى
على الفرحة وماانكرشى
بتيجى ساعات
لكن حالفة ماتكملشِ
………..
كلمات
الشاعرة يامنه اليمنى