وبنحيى كل اللى جانا العزا

وبنحيى كل اللى جانا العزا
وكل اللى ظاهر على التلفزة
وكل اللى خلى الصوان هكذا
وكل اللى فاضت عينيه بالدموع

وشيخنا المبجل بتاع الألوف
وكل اللى سجل حضور الضيوف
بكاميرا وسيلفى وقاعد يطوف
بضحكة سخيفة ف وسط الجموع

وبنحيى كل اللى قعد وقوَّم
وكل اللى ساب التلاوة وتكلم
بتاع الفرِاشة بوفيه المعلم
وكل اللى دمع وولع شموع

وكل اللى جانا بدون الكمامة
وباس فى الجميع بهمة وشهامة
وكل اللى عايش ف دور الزعامة
ف ساعة التوافد وساعة الطلوع

وكل اللى عارف بإن الصالون
عشان المعارف ذوات الدهون
و صف المشايخ وكهنة آمون
وكل اللى هز ف دماغه بخشوع

وبنحيى كل اللى فاتح حوار
وبين الفواصل قلبها هزار
ملوك السياسة وبتوع الخضار
ونواب بلدنا وكل البتوع

وبنحيى كل اللى وزع سجاير
وكل قال ده شهيد م البشاير
وكل اللى قاعد ف زواية يعاير
ولفت أنتباه اللى جنبه بكوع

و كل اللى نادى هاتوا الشيخ فلان
وساعة الحساب هرب م المكان
بتوع الأذاعة وكل الحيتان
اللى صوتهم مسمع ف كل النجوع

وكل اللى عجن ورا الميكروفون
مفيش حكم واحد ولا يحزنون
وكل ساب لليتامى ديون
عشان بس يظهر ويفرد قلوع

يا فارشين ع الحزن جوه الخيام
وعاملين مظاهرة ف ربع الختام
كفاية بدع تعبنا حرام
يا أمة محمد أمتى الرجوع !؟

كلمات :إسماعيل غزال