لغة الشعر سر حياه.

……….

   كلمات الشاعر 

إبراهيم عاشور عاشور

كنت مسافر في الملكوت

بينى وبينى سكوت فى سكوت.

خدنى الفكر سرحت شويه

شفت الكون بعيون مش هى

شفت بهيه ف أحلى زواق

شفت براح الكون وجماله

شفت جلال الله وكماله

شفت القدره شفت الخضره

شفت حياتى شريط جرار

ذكرى ف ذكرى

شايف بكره وقلبى مدار

شفت النخل الطارح بهجه

عند شواشى الحلم طلعته

خدت نسيم الدنيا ف عبى

طلت الخير وايديا تعبى

وعيال عمى

ياما لعبنا

ياما حنان الأم شربنا

مهما تعبنا ما نعرف آه

شفت ابويا ف عز شبابه

أرضه سماه

شفت الجده ومين سماه

وامى وهى بتستنانى

غيط حيانى

ميه بتروى العمر عشانى

كنا نقول (مية محاياه)

أرض جدودي وخير ممدود

كون فرحان ومالهش حدود.

شفت القمر السارح سارح

انجج نجمه واخدها معاه.

(ال جيم التانيه معطشه)

خدنى الشوق من تانى حدفنى

تنى أغنى أغنى أغنى

لما وصلت لبر نجاه…

للمناجاه

شفت الكون م البر التانى

دنيا كبيره ماهيش سيعانى

عالم ما اعرف لسه مداه

عالم صابح..

جى بيجر نداوته وراه

يا ألله 

تانى سرح بى الفكر شويه

نطق الشعر الساكن فيا

من جواه

وسط سكوتى نطقت (الله) 

طال القلم الفكره وباسها

واما اتأكد انه لمسها

(حس مداده دم حياه)

دبت فيه الروح م الأول

دون فى العنوان الأول.

(لغة الشعر سر حياه)

واما غوانى بسحر كلامه

أبداً أبداً لم باسلاه

خدته رفيقي وباستناه

صعب أفارقه لو لثوانى

صابر لما أحس رضاه

صابر لما أحس رضاه

       كلمات الشاعر 

إبراهيم عاشور عاشور