صَباح الخِير …

  كلمات الشاعرة 

منى عبد الرحمن

صَباح راسِم علىٰ شَفايفُه ابتساماتُه

بيضحَك بس من غُلْبُه

ولوْ نادىٰ عَلِيه قَلْبُه 

بتضحَك ليِه؟ 

يِرُد عَلِيه

أنا باضحَك 

عشان افْرِش جَناين ضِحك

لِحبايبي

واوَزَّع فَرْحَه لقلوبهُم

والبِّسْهُم جَمِيل تُوبْهُم

وأزرَع فِ الطريق خَطَوات بتِستَعجِل

عشان تِوْصَل

بكل الحُب والفَرحة

وتِرسِم فِ العُيون بَسمة

وتِهديهُم أمَل طارِح

بكل سَعادِة الدنيا

يِنَسِّيهُم أسىٰ امْبارِح

وتِبعِد عنهُم الأشواك

وأيّ معاني تأذيهم تكون جارحة

صباحكُم ضِحك من جوّا ضُلوع الرُّوح

مِنين ماترُوح… 

تِلاقي البَسمة مَرسُومة

عُيون تِغْزِل أمَل صَافي 

وبِتغَنِّي كَلام ثُومَة

(وهَل الفَجر بَعد الهَجر) 

(بلُونُه الوَردي بِيْصَبَّح) 

صَباحكُم إيه

صَباح بالخِير بَاعتُه الرَّب 

بِيشْفي ويعفي ويْرَبَّح

صَباح الخِير

  كلمات الشاعرة 

منى عبد الرحمن