كلمات 

الشاعر … احمد صبري

اكلم مين ومين يفهم

و مين هيحس اوجاعي

وغلطة قلبي عاش يحلم

يلاقي نهاية لضياعي

واضيع تاني اتوه تاني 

وعشمي يبقى ع الفاضي

ويرسم قلمي أحزاني 

على الحاضر و ع الماضي

واقابل ناس ماتسواشي

وافارق اللي بهواهم

وناس تانية على الماشي

بلاقي روحي وياهم

لكن عدوا خلاص راحوا

وسابوا ناس تعذبني

وقلبي يعد في جراحوا

وعيني كمان تحاسبني 

توريني الحقايق وهم

والحلم مات ف الحقيقة

تشيل راسي جبال الهم

وبتخدع كل دقيقة

يا عايز قلب يتقطع

يا عايزة روح تجرحيها

انا رايح ومش حارجع 

ولما نفسي حالاقيها

هابطل احب واصاحب

هابطل اوفي للخاينين

واللي يحب يتحاسب

يشوف حقي أنا على مين

انا اللي زرعت ايامهم

ورد وفل وحنية

انا ضحيت علشانهم

وهما بيضحوا بيا

انا إللي عذابي فوقني

وحلفت اني عمري ماكون

امين على حد دوقني

نار الندم بدمع العيون

وعيني كمان خلاص نشفت

وعصر بكايا انتهى

سنيني ف الحياه نقصت

على ناس حرام احبها

اكلم مين ومش لاقي 

حد بجد يفهمني

خلص صبري ومش باقي

غير ملامح فيها مني 

خلص صبري 

          كلمات 

الشاعر … احمد صبري