كلمات الشاعر
محمد طلعت
Talaat Talaat
خليك فاكرهم زينا
وشم ريحة قلبهم
من بين قلوب اتوزعت فى تراب بيبدأ بالرحيل
وأكتب فى أوراق الخشب تمن الدهب اصبح تقيل
وف أرضك المبدوره ليل أزرع صورهم يطرحوا ف عينهم نهار
و يسك ترباسك ايديك ويحضنك حلم الجدار
عارف ياباب
كل اما اشوفك بفتكر بيتنا القديم
و السلم المكسور وحلمه والمفارش والكليم
وقاعدة أمي لما كانت باعته خوفها لشغل أبويا
لما سابقوا الليل وحست انه غاب
لما نمت بلبس اخويا وسبت اسفي على الكتاب
والصالون ابو قلب مدهب
والكناريه اللى ف غيابي رفضه تشرب
والكلام وحزام أبويا لما علم ع الحيطان
وأختي لما تحب تلعب وأمي تعملني الحصان
والحنان والمريلا اللى حزمها بيج
والكتب بتشيلها مخله فى صف جيش
والشويش اللي تملي صوته يعلي في الطبور
والدليل ابو لمبة بلحه لما يشهد ع المذاكرة
والدكاتره وسماعتها كات هدية عيد ميلاد
كنت من ضمن الولاد
اللى كل الدنيا عارفه إنه متدلع زيادة
كنت اجيب الدرجة ناقصة
وامي تفرح بالشهادة
كنت اكتر حد يمكن
كان بيزهق م السعاده
عارف يا باب
لما ايدى اتعودت تقفل وتفتح
كل حاجه اتغيرت
كان ف حلمي اوضه فاضية سيبتها و أتاجرت
أمي سابت ليا ريحة
شغل ابويا لما يكتر كان بيخلص بالطريحة
ايوه فعلاً كنت بكدب
وأرمي كدبي فى الجاكته
وامي لما تجيب هدية كنت بطلب بسكلته
كنت قايسك بالبلاطه شبر شبر وحته حته
كنت بكتب جنب سته صفر واتلخبط فى ساعة
امي كات تعملي كبده لجل ماتزيد المناعه
كنت واخد ان جارتي تبقي أختي ف الرضاعة
كنت طيب والحياه كان فيها روح
كنت برسم حلم عمري جوه عمدان السطوح
كنت بتنفس طموح
واما ترباسك قفلها
قفلتك فتحت جروح
واللى فضلت لينا ذكرى
صوره عايشه جوه فينا مهما تكبر ليها عمر
بفته بيضاء عايشه لينا حتى لو اصحبها سمر
فضلوا دايماً يعشقوك
حلم مر انك تفتح متلقيش أمك وابوك
Discussion about this post