بـ أكلمك

Wael Rshwan

علشان حيطان البيت ما بتردش ساعات
وساعات تتوه مني
وساعات بتحضني
وساعات سايقه الغياب

عارف يا ؟؟ مين !!
انا اكتر واحد ليه أصحاب
مع ذالك عايش عمري وحيد
تلقاني كئيب وغريب وسعيد
وفـ وسط الناس تلقاني شريد
لكن والله ما ببقا حزين

في حاجات
فـ حياتنا ما بـ تعَدي
وحاجات بتاخدنا وبتودي
وحاجات ل حاجات
بتسلم روحك للإنعاش
فـ تموت ببلاش
وتحس بـ قبضة ملك الموت
مع إن الوقت الفعلي مـ جاش
والخطوة فـ رجلك تتبرجل
وخطاوي العمر بـ تتحنجل
وتحَوٍُش عمرك كله دموع
وكأن الدمع ده شئ يتحاش

كان نفسي أتعاش
واحس ان انا مخلوق بيعيش من حقه يعيش
لكن ايامي ما نصفتنيش
شبعان تلطيش
من بوء الكاس
ل إيد الدنيا ل إيد الأهل ل إيد الناس
لل مُر ال ما عمُره إتغير

كَدر صغير
مع اول لقطة بتوعىٰ يتيم
وبتكبر حبه فـ تتيتم
كان أول فصل من المعاناة
تاخد ع الوحده وتتعلم
إزاي تتكلم مع حيطة علشان ما تشوفش دناوة الناس
علشان الناس محتاجه لناس يعرفوا إيه معنى البني أدمين
علشان الأهل اللي بوشين
علشان الدنيا بـ تتمرجح
علشان الحظ بيتخبط
والخبطة بتيجي فـ نص القلب فـ تنزف أه‍
وبتنزف أه‍
فـ تنزف أه‍
فـ تلم جراحك وتخيط
مخنوق من نفسك فـ تعيط
وتفضفض مع جدران الحيط
صدقني يا صاحبي
إحنا الإتنين فـ عيونا عياط
والحيطة بـ تسمع للموجوع
فـ بتحضن وجعهُ وبـ تعيط
وتعدي سنين
وسنين وسنين // خمسين خمسين
خمسين ف البيت
خمسين للناس
خمسين احاسيسي اللي بتنداس
وكمان خمسين وإضرب×2

صدقني بدون حلفان ويَمين
انا عشت العمر اليوم بـ يومين
وما قولتش مره يا حيطه حزين
لكن دلوقتي يا صاحبي حزين
: :
كلمات الشاعر
وائل رشوان

Wael Rshwan