سجن هواك

كلمات الشاعر …
وحيد علي الجمال

وشك كرمش فجأة وشاب
ظهرت فيه اسراب تجاعيدك
وانت يادوبك كنت شباب
ماسك لسه في نبض وريدك
عمال تحسب إمتى الباب
يفتح سجن هواك ويسيبك

بعد العمر الضايع منك
راح يسمح لك حضن وليفك
تسكن فيه ويكون ترياق
هو بطهره هيطرد خوفك
بعد سنين زَرعِتها عجاف
راح تتحسن كل ظروفك

انت بحبه هتبقى عزيز
حلمك مش هيعدي خفيف
حزنك فيه تخاطيف تخاطيف
مش هتصدق ولا هتقاوم
طرح الفرح صبح بستان
كفى قلوب شبعت حرمان
قسوة ومر شجر خذلان

نذفك وجعك والآنات
غصبٍ عنك مش بمزاجك
خلصت كل حكايتي معاك
وانا متشعبط فوق احلامك
شوف ازاي شغلوني بسيرتك
وانت دفعت رفضت عتابهم
إطمنت بصلحك ليهم
خانوا العهد وغدرم بيك

وشك كرمش شد ملامحك
وإبيضت راسك مع ذقنك
قلت الصبغة تزغلل عينها
شفتها جايه عليك بتعاكسك
قلبك رفرف طار بسعادتك

عسول خالص انت ياعمو
طلقة وكسرت رُمح سهامك
اوعاك تخدع روحك تاني
خليك دايما عايش سنك

اوعاك تزعل انك شاعر
قلبك رافض يلبس شيبتك
وقت العشق بيصبح واعر
مابيرضاش ابدا ويسلم
الا بحب جميل متكلف
أنا على الفطرة الشعر في دمي
ماتعلمتش فن عروضه، ولا اوزانه
وقت الصدق بيطلع سهل
عمري ما شوفته في صورة كهل

عارف ان دا طبعا صعب
خليك دايما جوه حروفك
صالب طولك
مهما الدنيا زادت في الكرب
مش مقصود تقتل في مشاعرك
أو ترفض يبقى لك دمع
المقصود إن انت تقاوم

اي نهاية تكون فيها طمس
لما صارحتك بيني وبينك
كنت ساعتها خفيف الظل
كنت بتضحك رغم دموعك
دمك رايق سكران حزن
وانت مصمم تعزل نفسك
بس الوقت ماكنشي مناسب
اصل خسارتك كانت هم
فاللي وهبت حياتك ليه
صاحب روحك ندل وخاين
عمرك كله بيخدع فيك
وانت تزيد وتزيد وتحبة
.
ابعد فورا واشتري نفسك
واطلب عوضك يبقى رضاه
هو احن عليك من نفسك
كل الدنيا تهون في رضاه

كلمات الشاعر
وحيد علي الجمال