مخالفة شوق …

كلمات الشاعرة 

سارة زيادة

ف عنيْه براءة أوليْا 

وف قلبه نور

بيكفي كل العشمانين ف الضي

ساكنه الملايكة ف بُردته

والقلب هام ف محبته 

درويش بيذكر

……………….. حي

ريحة الحنين هزاه

يحسد قلوب اتكحلت من نور بهاه 

او حتى لمحت ضحكته ف طلة نهار 

العشق نار

بيشبه شمس بتفتح

بشاير دافيه تبدر قمح

سنابل خير

تِشَبَّعْ روحى لما تجوع

ولما اسرح ف تفاصيله

غرامة بتندفع فوري

كأني وقفت ف الممنوع

مخالفة شوق 

بتطوي السكه والاوقات

بكلمه

… تقصر المسافات

اسابق والغرام الريح

نمد الخطوة الفين مد

كفوفي لبُردته تِتمد

يصب الشوق لروحي كاسات

فتعلا 

…و تترفع سماوات

فتبدر ع الخلايق ضي

وترجع تاني تذكر 

حي

كلمات الشاعرة 

سارة زيادة