كلمات الشاعر 

الخال / حسنين السيد

يبدو إن الشاعر .. مَات ؛

والموجُود في مرايتي رُفات أو محْض خيال ..

أو يمكن يشبه واحد تاني بصُورته في بطاقتي الشخصية

…………………. محطوطة مكيدة بواسطة مصلحة الأحوال!

مش ده ( حسنين ) !

( حسنين ) التاني كان رحَّال جوَّال قوَّال .. ولا يعرف خُـوف ؛

وبرُوحه يطُوف في مسالك كل درُوب الليل ؛

ويقابل كل الشُّعرا الفُقرا الحقيقيين .. ويقول مواويـل ؛

……………. والحُزن السَّاكن جوَّه عينيه .. كان حُزن نبيل !

لكن يبدُو الشاعر .. مَات

والأرض اللي غنَّى لْها بدمُّه .. كأنَّها أُمُّه

مسـتنيَّة ــ بشُـــوقْها ــ تضُـمُّه .

…………….. 

………………………………. بس رُفات !!

     كلمات الشاعر 

الخال / حسنين السيد

Hassanien El-Sayed