رد على قصيدة … عشمنا في ناس ..!!

رد علي صديقي الغالي
الشاعر … محمود عبد الظاهر ..
وقصيدتة التي أبكتني
عشمنا في ناس ..!!
———–

كِتير ياصَاحبي إتعشمنا
وعَشمنا فيهم عَلمنا ،،
نِرسِم دَوايِر للخذلان ،
ونلِم فيها اللي ألِمنا..
عَملنا( x ) وعَلًمنا ، علي كل
خَاين أو بايع ،،
وبقلب جَامِد قفلنا فـى شَوارِع
الحُب الضايع

عَلًمنا فَرط الدَمع نكون
أشخاص من الأخِر صامدِين
نِقَرّب الصادق ، نهجُر
أصحابنا من ذَات الوشين ..

كل اللى راحوا لخصومنا ،
ودَعنا أيامهُم وخلاص
مابنشتريش اللي بايعنا
وقلعنا تاجهم من ع الراس .

نفضنا تُوبنا ، ومـ الأخِر ،
كُل اللي وَلف علي غِيرنا ،،
لا يُوم حيرسى في مراسينا
ولا مركبُه هاتشُوف نِيلنا..

بقينا نتعامِل بالمِثل .
وكلامي واضِح للعامة
فُراق فُراق .. . إيه الفارِق
ماإتفرقِت كُل اللّمة ..

وبكينا … لكن علي رُوحنا ،
وعلي وقتنا
اللي إحِنا خِسرناه ..
علي حُب سبب في جروحنا
وكل حِلو إحِنا عملناه..

ماعدش ينفع من تاني
نحِن ونعاتِب بكلام ،،
ولا حتي ح نآمِن من بَعد
ماقلوبنا أخدِت بالأقلام .. !!!

تعظيم سلام للي جَارحنا
بقلب مِستعصِي وقادِر ،،
تعظيم سلام للي خَذلنا
وقص شوقه من الكادِر ..
النُبل أصَبح شِيء نادِر
والأصَل فـ الأخِر غَلاب ،،
والجَرح يوم مابيقصدنا
بيجي من أغلي الأحباب ..

داوينا ياما ياصاحبي أصَحاب
ولا حَد فَكر يداوينا ،،
وشِربنا من ظُلم الأحباب لما بصراحة إستكفينا
الغَدر فيهم مش فينا
والعِيبة أهي طلعت مِنهم ،،
جرحونا بعد ماحبينا
وخانوا قلبى اللي آمنهم ….

كلمات الشاعرة
هيومة حمزة

باكينام حمزه