ع السطوح

كلمات الشاعرة 

قوت القلوب

جوه حضن الشمس نار

جوه حضن الليل نجوم

قلبي دايما كل يوم

ينتظر وقت العشيه

لجل يطلع ع السطوح

يلقي نسمه ترد روح

والنجوم فوانيس تنور

ركن جوه القلب أخضر

عمره ما اتعكر بغش

هو دا الشئ اللي باقي

من زمان عايش ما ماتش

رغم موت كل المعاني

إللي كانت عايشه بنا

ضحكه صافيه،

حضن دافي،

ندخل النار تبقي جنه

ضاع معاني كتيره كانت

بس كانت لما كنا

والنهارده لما ضعنا

إختفت كل المعاني من حواري الإنسانيه.. إنما رغم اختفائها

لسه عند القلب غيه..

يبني بنية حمام..

لسه قادر ف العشيه

يصحي لما الناس تنام،

ع السطوح يطلع أوام

يحضن النسمه اللي جايه

ويا ضي من النجوم..

يستحمي من الهموم والمواجع والآهات..

يبتدي بلغة السكات

ينتهي بلغة البلابل

ع السطوح القلب قابل

كل شئ من ماضي كان

داق كمان طعم الأمان

اللي كان مشتاقله ياما

يعني فعلا لا ملامه

لما قلبي ف العشيه

يهجر العالم بحاله

لجل يتعطر بنسمه

قاعده دايما ف انتظاره..

ع السطوح.

كلمات الشاعرة 

قوت القلوب

Kout Elkloub