الطريق …

كلمات الشاعر 

محمد تيكو

الليل طريق

ونهايته مش بدء النهار

هو بس اتدارى عنك جوه رحله مؤقته

راجع أكيد…… من بعد ما تنهي إستراحتك

خدت راحتك؟؟

يا لا شغل خطوتك ..

وامشيها ع اللحن ب هيام وبدون مساس للدروشه

أقفل بيبان (المعلشه)

واقطع إيدين (الطبطبه)

والصوره لو (بث) ف منام

أعتبره توفير كهربا

أهتم بكوالتي الكلام أو ب الحكم أو ب اللباقه

واللغبطه ف الإنسجام والنظره ل أناقة اللياقه

واياك تتوه ف النغمشه والفلسفه والإلتفاف

واياك تخاف على ميجا تنقص جوه باقه مزيفه..

الوضع أسهل من تصور حضرتك

أو حتى جريك جوه واحه من الخيال

مرسومه ف عيونك وبس

الوضع مش محتاج عقول علشان توزع تفسيرات

محتاج قلوب علشان تحس

إن البيوت وان الشوارع والدكك

مش لفظه ف قاموس الرموز

وان اللي ممنوعلك يجوز لما الجنون يتملكك

ف هاتلقى فجأه إن الدكك..

معناها فقرك ف إنتظار

هذا الغني يعطف عليه من بعد تنضيف العماره

أو حتى يحدفلك سيجاره ومن حريقها هاتنتشي

أو إن إيدك ترتشي علشان تخلص مصلحه

الليل طريق

والوضع أسهل من تصور حضرتك وتصوري

وان اللي بيسبب هدوئك كان السبب ف تهوري

وان انفعالي ف القصيده

خلاها مدهونه بغموض

وان انسيابها ف القرايه

كان السبب فيه الجمود وشعوري بالزيف والقرف..

وان الإصابه بالخرف مش شرط تتصنف (زهايمر)

الحياه تشبه لتايمر

منزوعه منه الإعدادات

ممنوعه فيه التعديلات

محجوبه فيه المعلومات والبوح ب أمتى معاد وقوفه

العمر منك فجأه ضاع ولسه بتحاول تشوفه..

الليل طريق

وانا وانت لسه جوه دايره وعكس بعض بنتحدف

انا وانت إيدنا قصيره 

من نقطه واحده ف مركزيه نمد إدنا ونستلف

والنقطه دي ترسم ما بينا

قطر ممدود ب اللقا مهما افترقنا

يبقى بالطبع اكتشفنا

اعترافنا باختلافنا هو شئ م الاتفاق

وان لو لقمتنا مره……. واي واحد فينا داق

ف النهايه أكيد هانوصل للشريط بعد السباق

حد فينا بقلبه نور ألف لمبه لبطاريه

وحد صفى ف روحه نيه

وبمهاره بينا ساق

حتى لو هادي وبطيئ وكعب رجله بيتهري

حتى لو أهوج سريع ع السكه ماشي بيفتري

يا صاحبي قولنا الليل طريق

والوضع أسهل من تصور حضرتك

وتصوري

وان اللي بيسبب هدوئك

كان السبب لتهوري…..  

كلمات الشاعر 

محمد تيكو

Mohamed Saleh