بدون هدف

كلمات الشاعرة 

 الأم لولو

عمرك خرجت بدون هدف

ماشي في طريق مليان حفر

تسمع لصوت المستحيل

ينده على كل الصدف

فتشوف عيون مليانة خوف

وتشوف فراق بين الكفوف

وتشوف ليالي اتطّعمت ضد الصباح

وقلوب بتخضع للظروف

وتقابل الحلم اللي مات

شبحه بيصرخ ف النايات

وتعدي على جسر الحنين 

توصل لبيت الذكريات

عمرك نسيت هو أنت مين

دورت على اسمك في كشف المفقودين 

وبعتت برقية لروحك تلحقك

فتنكّرت ما أنت فايتها من سنين

عمرك لقيت الفرحة محبوسة ف قفص

والحزن حر طليق ومضمون الفرص

والدمع بحر غريق بيبلع سكتك

والعمر كان غالي و رخص

مابقاش يهمك باقي كام

نفسك تسلّم عهدتك

ترمي السلام 

وتقول لاحباب الهوى

يااهل الغرام 

الحلم للميت حرام

الحلم للميت حرام

كلمات الشاعرة 

    الأم لولو