عاجز نظر

الشاعر … رضا البوشى

مفتتح

مفاتيح الصبر فوق خد الأيام صدت
وإنقطع الحبل السري من ليالينا
والبحر الهادي إتغير طعمة ولونه
ولا فيش شبكية قادرة تشوف أسامينا

إفطمي الحزن اللي لون
لون عينيا
رجعينا
عيال صغار بقوة حصان
قبل غليان الطوفان
زي أهل الكهف تاني
رجعيناَ
لملمي الحلم اللي باقي
فوق شارعنا
وف ليالي العيد
قومي إحضنينا
نفضي شوال الهموم
وإمسحي الخرابيش من
فوق الغيوم
إحقني الأيام بنفسج
من خانات اليأس قومي
إشطببنا
وإفتحيلنا خرم إبرة
فوق أبراج الآهات
عيشينا جوة بدروم السعادة
ليلة واحدة
ولبسينا لبس فاتح
ومطري عطرك علينا
عاجز نظر
ما املكش غير
شباك امل
نزلي ستارة امان
وإكتبيلنا شيك سعادة
إيجار قديم
طلعي الكبت المخزن
من لسانا
من جنون العظمة
وجنان الفلاسفة
طهرينا
خيطي الضحكة المهاجرة
وألضمي
القلب اللي إنكسر
فوق عنينا
علقي محاليل حياة
رجعي كل اللي تاه
جوة دايرة إهتمامك
وفي دفاترك
إكتبينا
دخلينا تاني حضنك
وإفردي شمسك علينا
وغسلي الميت في حبك
وإمنحينا تأشيرة دخول
وفوق رملك ونيلك
جمعينا
أنا اللي قلبي شبع مرار
وتركتي طن إنكسار
في مادة التوهة
حاصل ع المرتبة الأولى
عاجز نظر انا بامتياز
ما املكش غير
شباك امل
أنا البحر اللي كش
م الهموم
وحجمي بقى قد
السفينة
عاجز نظر
لكني زي السمك ليس
بآتنفس
باضحك كمان ع الوجع
وبأخدلي تعسيلة