كلمات الشاعرة
حنان شاهين
صليت ..
و صمت ..
و أديت الأمانة
بس حاسة روحي خايفة
من لقاك يوم القيامة
إحتمال إني عصيتك
في سجودي
لما مرة طال شرودي
في جملة قالها لنا المدرس
( المحبة خوف خيانة )
يومها صحاني الأدان
كنت عايزة ساعتها أنام
و أبقى أصلي لما أصحي الصبح عادي
بس قمت أجر نفسي من سريري
قمت خوف !!
كان سجودي يومها خوف
كان دعاي برضه خوف
و كل مرة كنت أجي لك فيها خوف
كنت أحس بشيء كاسرني
شيء بيكبر جوا مني
و يقاسمني في الحياة
لما صار الخوف اله
هاتسامحني ؟
لما ثورت في مرة
عالشيخ اللي قال
إني ناقصة دين و عقل
و إن ليا نص ورث
و نص دية
بس أنا استغفرت يومها
و اعتذرت عن جموحي
و اقتنعت إني ببالغ في طموحي
و اعترفت بحجم روحي
و اني انثى
و صوتي عورة
و من يوميها صوتي واطي
بس كان جوايا لسه بقايا ثورة
هتسامحني ؟ .
كنت بادخل أوضتي وحدي
اسمع المزيكا
و ارقص أو أغني
و ان لمحت خيال أبويا
أعمل اني …
كنت باعمل أي حاجة
و إن سألني اكدب عليه
كنت أقوله إني باذاكر
أو بصلي
كنت خايفة من عقابه
نفس خوفي من عقابك
عشت عمري كله أكدب
لما صار الكدب عادة
و كل مرة كنت أكدب فيها
أحس بشيء كاسرني
شيء بيكبر جوا مني
و يقاسمني في الحياة
هتسامحني ؟
لما كنت باقول لحد إني باحبه
و الحقيقة إني عشت العمر
ما عرفتش أحب
حتي نفسي
رغم ان الحب كان
في الأصل فرض
من قبل بعث الانبيا
و من قبل خلق الارض
قلب راضع م البداية
خوف و كدب
مستحيل إنه يحب
هتسامحني
اني ما عرفتش أحب ؟
…
قلبي شافك
في المساجد
عطر وردة
في الموسبقى
صوت كمنجة
في الشوارع
بنت رايحة المدرسة
بفيونكة بيضا
مالية كل الدنيا بهجة
رغم عنهم
رغم تأويلهم
و نارية خطبهم
عن عذابك
و انتقامك
و الجحيم
رغم خوفي
و ارتعاشة روحي منهم
لسه فاضل مني حاجة
حاجة زي حنيني ليك
حاجة كنت بحسها
و انا باحتمي م الخلق بيك
حاجة ما بتشبهش حاجة
بس حلوة
حاجة بتخليني
رغم كل ذنوبي دي
عشمانة فيك
قلبي سلمته إليك
لو وزنته بريشة يخسر
يا حبيبي
إرمي قلبي في الجحيم
أو سامحني.
كلمات الشاعرة
حنان شاهين
Hanan Shahin
Discussion about this post