يا پوي 

ع الطب ….وسنينه

============

  كلمات الشاعرة 

 چيهان أحمد النجار

بتوع الطب بيقولوا جواز الأهل ماعرف ايه

 وانا والله 

يابن العم ماعرف ليه

 بيحكوا عن جينات وحاجات

 لا ليها علاقة بمشاعر 

ولا دخلت في أى صفات

طب اعمل ايه محبكشي 

ماهو لو كان بإيدى الحب كنت قفلت روحي عليه 

وكنت منعت احساسي وقلت لنفسي ميجوزليش

 برغم الشرع قال جايز

ولما سألت سيدي القلب قال عايز 

وانا ماقدرش أكسر كلمه لجنابه

“سعادة القلب” واخد عمري لحسابه

وانا والله يابن العم  

……….

/انت الطب 

/انت الحب 

/انت العمر ..وشبابه

وانت الليل وطول باله…..

وانت الصبح وعياله

ولو مقالوش ولو قالوا انت حقيقتي والنيات

 وانا منك كروح الشعر في الأبيات

فخلي الطب 

والحكما يعيدوا النظرة ف التحاليل

ووصوهم يشوفوا بديل 

وانا متأكدة م الحب عمره مايجي منه عليل

ياواد خالي اذا دخل الغرام القلب متخافشي

 حكيم القلب منظارك مابيشوفشي ولا بيعرفشي علم الغيب

وباسم الحب والله باقولك عيب متدخلش في التفاصيل وخليك في الوجع والداء وشوف لي علاج بديل الصبر

شوف لنا حاجة تبقى حياء ودور عن علاج للكره عن ترياق

وسيب الحب لاصحابه

عشان هو علاج الداء.

      كلمات الشاعرة 

 چيهان أحمد النجار