عشان قلبي شافوني عبيط

كلمات الشاعرة
أمــل جـبـر

عشان قلبي شافوني عبيط
بوزع حب ع المخاليق
بشوف الناس بعين طبعي
لا بنافق ولا بخادع
بشوف الدنيا مرسومه بلون الورد
بشوف الشمس لو تحما
عشان بتخاف علينا البرد
واشوف البحر عسل صافي ومش مالح
وكل الناس كلامهم خير ومش جارح
وبتصالح في نص دقيقه وبسامح
قالولي أسبني م التدليس
عشان الشمس لو تحما أكيد حنموت
وإن البحر مش صافي
ولو يعلى يهد بيوت
ومين قال القلوب صافيه وفي أبليس
وفيه خونه وفيه تدنيس
وان الدنيا كما ورده
لكن حمرا بلون الدم
يموت كل الضعيف فيها
ولا بيهم
قالولي خلاص مفيش بنا خلاص حملان
زمنا ..في مليون ناب حياكل حلمك الغلبان
خلاص خلصت
مفيش صاحب ولا عيله ولا لمه
ولا في أرض ولا أمه
مفيش في أمان
وقالو الصوره مقلوبه ومش واضحه
في عين عميان
وشافو الدنيا من بره
بكاميرا بعدسه مكسوره
بدون تظبيط
وانا الي طلعت في الاخر
ضعيف نظري………وقلبي عبيط

كلمات الشاعرة
أمل جبر