صورة مهزوزة
كلمات
الشاعر … احمد صبري
مهما اعاتبك او اسامحك
عارف انك راح تخون
وان انا على نفسي باضحك
واني شايف ف العيون
زي ما اتعودت جرحك
انت متعود تكون
تبقى ويا حد شبهك
حد مابيعرف يصون
ايوه عارف اني جيتلك
أصل قلبي لسه خايب
بس م الصعب يأمن لك
مهما كان عاشق ودايب
ايوه ياما شوفت منك
اللي مايجيش من حبايب
والزمان قادر يذلك
مين بيفضل فيها غالب
عيشت عمري اتمناك
تبقى حضن وفيه حنية
كنت حاسس شيء جواك
هيقربك وتحس بيا
ليه بقيت مخدوع هواك
خدت دور ف التمثيلية
بس مش فارق معاك
ابقى ليك او تبقى ليا
هي دي حقيقة حكايتي
اللي جمعتني بعينيك
ايوه مكسورة مرايتي
اللي انا شايفها فيك
صورة مهزوزة وحقيقتي
حد مش غالي عليك
غلطتي حناني وطيبتي
حبي ليك خسارة فيك
رغم اشواقي و غرامي
انت ماتبقاش تلومني
لما هيقل اهتمامي
لما ماتبقاش ف حضني
والفراق فيه انتقامي
حق جرحي حق حزني
بكره هيجيلك كلامي
وانت مش عارف تشوفني
كلمات
الشاعر احمد صبري
Discussion about this post