كلمات الشاعر 

السيد عبدالفتاح

متغيرة كل الظروف ،

حتى الحروف ..

لابسه السواد

ماعرفتهاش من غير نقط

أول حوار للمعركة ..

جثة قتيل

مرمية فوق خد الرصيف

ومافيش شهود

غير لقمة من حتة رغيف

جنب الحيطان

مترددة تثبت حضور

كان الطابور ..

واقف ساعتها وملتزم

ولافيش بشر ،

كل اللي كان واقف سراب ..

حبة عيال متكممه

كان في ولد من غير ملامح توصفة !

ومعاة بطاقة حصته من غير نقط

مااعرفش ليه تموين حياتنا بينتهي

كل السحاب كانت عيونه مدمعه وقت الغروب ..

والشمس حالفة ما تترسم من غير وجع

ساعتين وواقف فى الطابور ولا فيش أمل

النمل لاحظ خنقتي بطل يخزن لقمتة !

حتى الجيران م البلكونات ..

حدفت علينا سترها

كل اللي كان فايق غراب

قاعد ينوح من غير سبب

مااعرفش ليه كل التراب ..

معجون بمية معفرتة

واما حاولت اكتب شقى ،

ومافيش ملامح شقشقة ..

السطر قرر الانتحار خنق القلم !

طفحت حاجات مستوردة م العم سام ،

كل اللي نام من غير غطى

نقش الندى فوق جتته قرص الترب

كلمات الشاعر

السيد عبدالفتاح