شكيت بإن الشمس

كلمات الشاعر …
السيد عبدالفتاح

شكيت بإن الشمس
في حد راشيها ..
علشان ما توصلنيش
وسمعت إن القمر
فاصل فوانيسة
بالعند قال فيا !
أما النجوم شفتها
كانت ف عز الضهر
بترازي في المخاليق
وانا لسة جاي ع الريق
ولقيتها ناويالي ..
فأخدت موالي
وفرشت ع الترعة
كام حلم م الطازة
الشمس لمحتني
بعتتلي ف إزازة
نفسين على الماشي
قام جاني أنباشي
وعمللي كام محضر
أمي كانت واقفة
بتلم ف الأحلام
متبعترة ع الشط
حلمي الكبير البكر
فكر بسرعة ونط
حاول يلم الدور
ويشوف شعاع مكسور
ويجبسة للصول ..
علشان يفلتني
الترعة بلتلي
أحلامي بالطينة
ف انا جبت سكينة
سنيتها بسناني
ونويت افضيها
من طميها الزايف
كان آخر العنقود
ف الحلم واد خايف
لسة مايعرفشي
طعم القمر والشمس
كان فاكر ان البحر
صافي ماهوش مالح
كان فاكر ان الطمي
بيحن ع الحرافيش
كان فاكر ان الصول
عاوز جنية بقشيش
كان فاكر ان الفيش
مش بس بالصمات
وان العيون بتقول ..
مهما اتملت بسكات
كان فاكر ان الشمس
هتحن وتنقط
ترسم أماني الولاد
ع البحر والترعة
أنا قمت ولحقتة
واديتة كام جرعة
علشان مايحلمشي

كلمات الشاعر
السيد عبدالفتاح