عشقك باهت …

كلمات الشاعرة
رباب الجورية

زي رغيف العيش الابيض
عمره في يوم مايسد الجوع
..
زي الحلم العربي( الأبعد)
بأن الوحدة ليها رجوع
عشقك فاسد
زي الدوا لو زود جرعة
زي الارض الرافضة الزرعة
زي ايادي ام بترمي كيس متعبي بواقي الرحمة وطفل جنين
زي وعود مِن مَن لم يملك لما باعت
أرضي وعرضي ب فلسطين

عشقك قسم القلب اتنين

نص بيلضم نبضه بشوقه
فيخيط لحنينه عرين
ونص بيكدب شايف غدرك
وبيدّعي انه اعمى العين
..
نبض كجندي داخل ارضك شايل كفنه بين كفين
فاكر انه راح يستشهد لاجل مايحمي لون الطين

ونبض كطفلة قتلوا برأة عفة توبها
ونسيوا الدين
وهي بترسم ضحكة بريئة فاكرة الدنيا لسة بخير

كنت بشوفك جوه مرايتي.
معكوس صورتك.
كل ملامحي عاكسة بقوه
نفس ملامحك
كنت بحسك جوه الجوه
وبحسك ف الدم بتجري.
فجأة الدم ده اصبح مية
تحت المجهر باين حصري
ان خيانتك اصل النية
.. وإن رحيلي اصبح جبري

بعته بكام.

قلبي العايش جوه سبات
لاضم ابرة وخيط من جوعه
غازل من احلامه كاسات
صابب فيها كسر ضلوعه
شارب من صحته وياك

بعته بكاااام..
ولا الكام عامل كام من كم كلمة ف قلبي اتكتمه وباتوا ركام
..
كلمات … الشاعرة رباب الجورية