لونه داكن
عامية مصرية
كل الآمال ماتت
ولا فيش آمال حيه
والشمس رافضه تجيب
الضي لعنيا
صوت الحياة مخنوق
يمكن تلاقي شروق
يجيلها بعد شوية
****
قاعد لوحدي هنا
بجراح قديمة ومزمنة
مالهاش شبيه ولا زي
كل الحبايب خانوا
والقلب رغم أحزانه
أكيد هيفضل حى
****
الغربة ليه عشقاني !!؟
بتقتل في قلبي أماني
وحلم قديم جدا
في وقت الفجر ما يدن
ألقاه هنا ساكن
لون الشروق داكن
****
من غير عتاب وكلام
من يجي عشرين عام
بوزع الأحلام …..
لأي حد أحتاج
ونفسي أمحي أوجاعي
وأشيلها في المونتاج
وأن كنت أزعجتكم
أسف علي الإزعاج
عصام سامي ناجي
Discussion about this post