كلمات الشاعر
محمد جمعة
في كشكولي معادلة ( الخدين ) صعبة !!
و كراسي في نحو سكوني ١٠٠ ضمة
و كل ما اراجع المنهج يقولي الفكر مش لما
تكون الميس موجودة ياعم اتأنى و استنى
ف اراجع تاني مع نفسي ::
في جذر اتنين تكون العين على الدايرة
و نون النسوة في موقعها تكون مظبوطة ع الزاوية
و يبقى البسط متساوي في اعرابه من الجملة
فنجمع طرح كام كلمة و نقسمهم بدون باقي
لإن الجملة فعلية ف لازم يبقى اعرابها …
على ( ط نق ) تربيعها في تاء تأنيثها متساوية
و أما العين في تشكيلها لوغاريتمات
لأن الجمع للضلعين يساوي الرفع في المقامات
إذا كان البيان مرسوم على الفاعل …
ف تبقى القسمة ع المفعول و بالحسبة
نلاقي الجبر حولها لنظريات
مربع كل اضلاعه بفعل آهات …
يضارع سين بتتأوه بدون إثبات
ف احط الهمزة ع الغمزة أداة تفسير
و اخلي الضمة دي استثنا مع التعبير
حروف الجر ب ارسمها و بالبرهان
عشان اوصل لبيت شٍعري بدون تكسير
و اكد حسن تفسيري بلا اختصارات
حلول و حلول في كراسي …
و حافظ درسي مش ناسي
مذاكر منهجي كله و فاهم بس انا ( مرعوب )
و رغم الميس و في عيونها كإن الإمتحان مكتوب
لكن ملبوخ و متلجلج و كل حروفي بالمقلوب
دا حتى ف كل ارقامي … ب احس كإن ممسوحة
و رغم الحفظ طول سهري … و تعب ( التيرم )
مجرد ما ابقى قدامها الاقى كل ده مشطوب
كإن دروسي في دماغي ….
غرام ماضي ف هوى المحبوب
طب اعمل ايه ؟
**********
كلمات الشاعر
محمد جمعة
Mohamed Gomaa
Discussion about this post