نقول تاني

كلمات الشاعرة …
ميمي محمود عبدالجليل

كل واحد فينا شايل
م الشقا حبة جروح
فينا ده اللي دمه سايل
واللي طلعت منه روح
واللي تعبان من ظروفه
واللي مش قادر يبوح
هيا دنيا ومكتوبالك
يوم بتفرح ..يوم تنوح

دنيا بيقسمها ربك
كل واحد شال له شيله
اللي كانت تحني ضهره
م الحمول صارت تقيلة
و اللي كان جامد و شالها
عدي يومه بميت وسيلة
طولها زي العرض …
عادي !!!
تمشي ايامه الطويلة

اوعي مرة تبات شايلها
و الله م بتسوا الاهات
او تنام غضبان في ليلها
تحسب اليوم بالساعات
دنيا تخدع مين يصونها
كل يوم فيه حد مات
فكها من فوق كتافك
حتهاديك.سكر نبات !

كلمات الشاعرة
ميمي محمود عبدالجليل