ما تزعلشي

كلمات الشاعرة …
مرفت جابر
…………..
أمانه عليك ما تزعلشي
ولا تغضب ف يوم منّي
م انا اللي الحب جنني
وخلّى العقل يتّاخر
وانا العشق اللي له أوّل
لكن دايما مالوش أخر
وانا الغيره اللي معناها
غرام لاكن ..
من الفاخر
أمانه عليك ما تزعلشي
ولا قلبك يكون ساخر
من الحب اللي جوّايا
ولا من شوقي أو غيرتي
م انا اللي باشوف هاوك روحي
وضحكايتي ودمعايتي

وانا اللي عنيك ما بتسبنيش
واشوفها حتى ف مرايتي
وف خدودي
وتسريحتي
وانا اللي هواك سبب حيرتي
وأكبر سر لجنوني
بلاش تزعل
بلاش تبعد
بلاش ترميني لظنوني
د انا اللي باضم قمصانك
وابوسها واقول وحشتوني
وانا اللي بانام على صورتك
واقوم والصوره ف عيوني
ولمّا يشدّني صمتي
ولمّا يجرّني سكوني
بيبقى عشان خيال طيفك

معدّي بيبتسم ليّا
وايده بحب ممدوده
بتمسح دمعه ف عينيّا
وإيده التانيه فوق شعري
أوام قلبي يقوم يجري
يضُم الطيف ويتمايل
ويرقص رقصة العشّاق
ويضحك ضحكه معناها
جنون الحب والأشواق
ونبضي يخش فجأه سباق
من الأشواق ما يخلصشي
ما تزعلشي

كلمات الشاعرة
مرفت جابر