باللهجة العامية … بنت الأصول

بقلم الشاعرة … ليلى السليطي

تدور الدواير دايرة على جملها
والبير ناشح و الوطا حصحاص
وماجل محبة قاعدة في محلها
عالساقية العصفور مع الحراس
لوكان غرضك في السقا اسهلها
تحط ايدها عالبير تملى الكأس
وان كان غرضك في الهنا هملها
فوق سرجك جيب احلى لباس
بنت الكرامة الكاملة باكملها
شرطها المطلوب ما ينداس
والفاهمة تدير بالها على فحلها
ابن البوادي فحل و عز الناس
كي توصل لاغراض لمواصلها
ينادو على الجمال والتراس
يقيمو ليالي الانس في محفلها
وباباها يشرط شرطها مقياس
والي يحوز ام الزين ويدللها
يهدي خيوط التبر في قرطاس
ويذبل العينين بكحل شفرها
على باب دارها معلقة كسكاس
والعام صابة خيرها مخضرها
والفاضل من الزاد للعساس
هذي عوايد اهلنا خواطرها
ونقوشها بوشامها عالراس
ولماعرفش ديارنا يقدرها
يبدل طريقه و ما فيها باس
و قصيدنا بحروفنا نسطرها
سر للمعاني وللحديث قياس…!!
.

بقلم الشاعرة ليلى السليطي