بقيتى فين …

بقلم الشاعر … ناصر الدسوقى

ولِيه شايفك قفلتي الباب

وليه دايمًا تقولي مفيش

يريت ياأمَّه تقولي عتاب

منيش عايز هنا بقشيش

وليه حالك معايا يِعِل

وسَفْسفت التراب م القِل

ومِتمظمظ أنا في المِل

وِليدك يا أمه مش درويش

وليه بالمِيَّه مقفوله

منيش عارف أجيب لُقمه

ولا خَلقايه مشغوله

تَلتِّمتار لِدِي الهِدمَه

بَلَملِم في القُصُوب مكسور

بنام مغرب وبصحى فُجُور

وتِكشِيطِّي من الدَمُّور

وِمِتملمِل تراب وحشيش

من الفجريه حد الضهر

يوميتي في الكِرا خمسين

وغيري من أذان الضهر

يكون لملم معاه ملايين

وضهري في الصُّرُوب مَتنٌي

وِكَلْ من اِلشَّقا مَتني

وخايف لو كده متني

وأنت يا عايقه متحسيش

من ديوان ( بقيتي فين ) عاميه

بقلم الشاعر …..ناصر الدسوقي