رمضان يامجمعنا …

بقلم … الشاعرة د . سحرحليم أنيس

رمضان يامجمعنا
وعلى طبليتك مجمعنا ومشبعنا
هاتى ياأم إحسان قمر الدين وكنافه كمان
وانت ياأم حسين فين
طبق سلطه الباذنجان
ونادو لست أم على تفطر معانا ويلا نصلي أهو جه الادان
وادخلو ياولاد الجيران كلو يحى الرحمن
اومال دا شهر البركه والاحسان حطى يانفيسه طبق الخشاف وانت يازينب فين الاصناف دا من اللحمه مشويه وجايه والله مستويه والفراخ كمان مش كدا ياام مصطفى دا صنع اديا ويلا بينا ع التراويح وانتو ياولاد قيدو المصابيح وهنعمل فته وشوربه كمان ونادو نعشى ابن الجيران ويلا ياسنيه لشارع الغوريه وهاتى ياحنان صنيه قطايف والخشاف كمان يلا ياهنيه فين أم كيرلس منادتش عليا هو الاكل هيحلى دا هى البهيه نادى يامحمد على اخوك بطرس قوله المائده جاهزه وفيها ملوخيه بالليه ماهو مجمعنا شهر الاحسان وكل الخير من الرحمن فين البسبوسه ياولا لعم حافظ بتاع النور وانت ياسعديه هاتى القطايف لخالك عم شنوده دا هما الاهل ومعانا سنيده ماشفتيش ام كيرلس وهى بتقلى القطايف وبنتها مريم طشت الملوخيه والكل شايف خد ياعلى ٥ جنيه هات حجاره لفانوسك انت وسعد ابن جانيت خالتك ياولا وهى مرضعاك ويلا نحمص لب البطيخ وفوق السطوح نشوى الدره ولمه العيله اهى متعنتره والف مرحب يارمضان يامجمعنا بالصلاة والصوم والاحسان ولامم شمل جيراننا ومحبب الكل فى لمتنا وياسلام على السلام وياسلام ماتيجو نخلى السنه كلها رمضان عشان يبقا
سلام فى سلام ومرحب بسلامك وسلام يارمضان

كل عام وأنتم بخير
بقلم… الشاعرة
د. سحرحليم أنيس
القاهرة 3/4/2022