/ قصة لغرام قصة لفراق
—————————–/
د / العابد عبد الرحيم …
(( لقد حاولت نظم هاته القصيدة عن غرام انتهى بفراق
بين جار و جار..لا زال الأحباب والأصدقاء يحاولون
اصلاح ذات البين ))
( زجل)
يا لمفارقني حرام بغتة تظلم
من كان فالعين مسرار امليح.!
واش الزين فينا امشى و ابقى لقبيح؟
أنا نجري وراك أحمق نوقف وانطيح.!
والقلب مجروح يلعب
سار بين لهوى والريح.!
* والحب ذكرى رجعت تحاكي لطلال.!
ابكيت بالدمع ارويت
كل أرض عطشانة
و اضحكت ضحكة العاشق ولهان
واجبرت راسي أنا أنا
ما عندي افراق عليك.!
* من بدل صورتك رجعها خيال.؟
من كان حيلة وأسباب.؟
انت و القلب ما ارحم.!
و اللاٌ حاسد من يعلم.؟
* و اللاٌ انا ما ظنيت هاذ الحال.؟
فين أحضانك الورد والريحان
و الياسمين و الزهر اللٌِي كان؟
* وكلام لعسل شهدة غاب ما بان.!
وانت انت يا الجافيني.!
انت يا ناسي كل ليام.!
يا قلبو توب لله توب
يا ناسى يا ناسى الماضي.!
.
لا تقاسي و اتعيش فاعذاب
يكفيك لهجر ما دار او باقي
لمحبة ماتت رجعت اعداوة
و انت عايش خيال فاخيال
فاقصور كانت البارح فاحلام
من زادني فاهواه
يكفني من امحاينو.!
والعشرة اطويلة شاب فيها الراس.!
ماشي عشرة ليلة و انهار يا ناس.!
من ردني مجدوب ساهر بلا نعاس.؟
نمشي مولوع نحكي ننظم كلام
مرة انصيب معني
مرة يعثر اللسان.!
لا اتلوموني على هاذ حال
من لا مني يبتلى من قال
لفراق بالدمعة……من العين
والقلب مسكين أو مسكين
طايح فِ همو يبكي واينين
من ارشدنا لطريق اليمين
لا ارحيم لا حد احنين
يجمع ما بين القلبين
من يعرف ستة من ستين
يعرف سبعة من سبعين
من اقرأ اكتاب العاشقين؟
يفتي علينا من
لفتاوي فتيتين
سولوا عنتر مع عبلة
سولوا قيس مع ليلى
سولوا جميل مع بثينة
قولوا الله يصلح بينا
ترجع المياه عذبة زينة
ربي وحدو القادر بينا
يجمع اشتات القلبين
سمحوا لي احكيت احكاية
بداية قصة العشق بلا نهاية.!
(( ما بالكم لو كانت هاته الحكاية بين جارين.؟ ))
د/ العابد عبد الرحيم : 24/03/2023
ملهمتي الفقيه بن صالح المغرب تكتب للجميع.
Discussion about this post