كلمات الشاعرة
عزة أحمدابوزيد ابوزيد
بقولٍك إيه …
ما ينفعش
نكون مكانين لشيء واحد
نبدّل كل يوم أحوال
ماينفعش أكون دوبلير
وامثّل دورك البهتان
ماينفعش اني أتمنى
أشوف لمعة تكفّي سنين
ما انا اللي بيك
باكون إنسان
واكون شايفك وأكون حاسّك
واكون في البعد
حامي قلبك
وراحة بال لسعادتك
أكون شمسك
في ليل البرد
و نبضة عايشة جوايا
بتبعد عنك الأحزان
بيتي سكنه كان .. حضنك
ومن غيرك أعيش ازاي
باموت ف اللحظة ١٠٠ مرة
وانا عايشة
باطبطب قلبك الجافي
وباسكن جوه اوجاعي
وإيه الداعي
وانا قلبي اللي كان ساعي
وبيدارى ..
في ضحكة باهتة مغروزة
عايشة فيها مهزوزة
وفرق
كبير مابين قلبي وبين قلبك
مابين وجعي وبين وجعك
مابين قاسي وبين ناسي
وبين بيحب
وانا الطوبة اللي مات بيها صاحبها الدّب
ومش هانكر واقول نا سياك
ومين راح ينسي
ميّت تاني عاد له حياة
روح مع روح واتقابلوا
في ليل مناجاة
مش راح ألومك
ولا ح اشكيك
ولا راح اجيب الحق عليك
كلمة أخيرة
من إحساس
عشقك يوم
فتّح عينك
فوق م الغفلة قبل اللوم
بص ف عيني
تلقي بكاها
تلقي حاجات مكتوبة جوّاها
أول كلمة
أنا حبيت
والتانيه ازاي انساك ؟١
كلمات الشاعرة
عزة أحمدابوزيد ابوزيد
Discussion about this post