يا أنا يا أنت والزمان طويل …

د / العابد عبد الرحيم …

/ يا انا يا أنت وازمان طويل

————————————/

 

(( يجب على الإنسان أن يتعلم فن المراوغة قد تدعو إليه

بعض الظروف))

 

من اضرب الكف عالكف خمم ساعة و اندم

طارت الشحمة و اللحم ابقى لعظم عالعظم

يا كيتو يا كيتو من الريح أو لعجاج يشقم

يرجع الكف عالكف فين يجبر الخد يلطم

عفريت روحاني يقتل ما يرحم

اعدو صنديد…. يزحف ايحطم

 

((زجل))

 

يا انا……………يا أنت

و اللٌي اسبق ايفوز.!

 

(ريحة و اللاٌ ذبحة.!)

 

و الجرح…….اعميق

احلف ما ابغى يبرا.!

 

و الزمان طويل

قاهر! كل لعباد

تعرف……حاجة

تجهل حاجتين.!

 

* قالوا العلام اهرب….أو خلا السربة.!

 

قالوا :

( كان موسم ولٌى حركة)

واش

العز والنخوة هزت لرحال؟

 

اللٌِي افراسك عارفو راسي و الصمت

انا حافظو بِلغتين انت حافظو بِلغة

 

انت في يدك وردة

مصنوعة تبهر لعيون

انا بأمرك مخدوع

نحمل ف يديا شوك

 

مفروض علي و الحمل حمل اثقيل.!

 

إلى احملتو نتعب

الى اطرحتو نرتاح.!

 

كل الوقت أو وقتو و السوايع بدالة.!

 

اعرف وافهم

معنى

لكلام…غاية

 

انا نزرع الحب و انت تزرع الحرب.!

 

كيف العادة انا الظالم

ورقة و اختمها الحاكم.!

 

قالوا لا اتنازع لا انخاصم كمدها و اصبر.!

اصبرت او قاسيت حقي فالدنيا صنعوه.!

 

لبسوني اعباية بالمقلوب

قالوا هذا……اهبيل تابيه.!

 

يمكن.!

 

وتاني…الجلاب

قلت اهنا انبات

 

أنا قلبي عامر

هما لا اخبار.!

 

آه ضنيتها دار الضيافة

و أنا في حبس مردوم.!

 

* يا من قال الواد هامد يدخل ليه.!

يا من اخذاتو الحملة قَلٌبْ عليها.!

 

العوام ينجى يوصل لبر لمان

لمسن كِالعادة يحتل فقاعو

 

لا يشكي….لا يبكي

منو ألف منو الفين

أنا أنا واحد منهم

لون أو أشكل امغيٌر

لخرين غير تابعين

قايداهم الشٌَا والرٌَا

 

يا عايشين في دار غفلوم.!

اللٌِي اشرى الذل.ذل راسو.!

اللٌِي اشرى العز يفتخر به.!

 

ياك الدنيا اعبار أو ميزان.!

رددها لا اتخاف

رددها لا تتحسر.!

 

* عيط الميزان الميزان وا فين اعبارك.؟

 

مول النوبة مول لحساب

مول التوبة….مول لعذاب

اللٌي انفخ فالربح مريوح.

 

و اللٌٌي اتبع لهوا غدا يهوا

يحصد منو لخوا والسفاية

 

*راسي يا راسي راني عليك انعول.!

 

يا من ازرب دار صاحب

بلا صحبة يبقى وحداني.!

 

سولني انعيد لك ما صار بي

و اللٌي ابحث يعرف اخباري

 

انسهرو الليل و اللٌيالي

الغالب …. سار أو راح .!

و المغلوب ابقى براني .!

 

أنا ابقيت افراجة

وسط العدياني.!

متقول امعلق مشنوق

دمي ايسيل كالودياني.!

*حديثهم تيه في تيه كالدلو خاوي.!

 

لا حكمة لا فايدة

غير الطنز بالعلالي.!

يا امعمر لٌجياب

يا درهم لحلال فيك.؟

فين…سرتي ..ايام.؟

فين اغبرتي ليالي.؟

 

* لا عشق لا اغرام…دايم فالدنيا فانية.!

* يا عبد لا تطمع سَوٌِي اصروف ميزانك.!

 

غير اضربني يا يدي

أنا و الله لا ابكيت.!

الدمعة اعزيزة

ساكنة فالعين

عايشة بالنخوة

حراسها أشفاري.!

 

أيام لغلا أيام الحزة.!

من يرحم من يشفع.؟

 

أيام الطنز و الطنز فيه أو فيه فيق رد بالك.!

 

احضي من الحيلة

القالب والتسرويلة

اعرف خويا ايحفظك الله

من اتٌكى على حيط راشي

كان الله او به ( مرحوم)

 

خلاص داروا من الحبة قبة.!

زرعوا السلاح رجعت جدبة.!

 

نفخوا فالريح روح لعداوة .!

فرشوا الشوك فرشوا السدرة.!

 

كنت اللٌول فيهم.!

 

لغطا….اغمامة

—– واللاٌ—–

اسحابة دايزة

 

أنا انعيش أنعيش و لو غلقوا لمنافذ.!

انقولها انرددها ترداد أنعمر فمي بها.!

 

اللٌي أمشأت ترجع لي

يا ريحة اتراب ابلادي

خايف نفقد…….اصلي

 

امل ما لُو

ثمن

ولا سومة

نعطيك…….دمي

نعطيك… روحي

انضمك لصدري

 

نركع انقبل…..يديك

نركع انقبل اقدامك

نهتف عالي فاسماك

 

انا حبيبي هذا وطني

انا حبيبي هذا وطني

 

(يتبع بإذن الله)

 

ذ/ العابد عبد الرحيم : 17/03/202