بقلم الشاعر عماد مهران …
لكل المثبتين ف كشوف
بواقي الحلم ..
لكل العشمانين ف وجود
براح بيلم ..
لكل إللى اتركن دمعه
على خدوده .
لكل إللى ارتكن همه
على حدوده ..
لطعم الفرح لما الفرح يتأخر ..
لأول حلم أعوم جواه ويتبخر ..
لأول كل شيء وآخره
لآخر حد مش فاكره
لاخويا ف صغره رباني وربيته
لصاحبي إللى حافظت عليه
بنيت حواليه ورب بيته
لبكرة إللى اتسرق مني
كبرت بهمي عديته
لحظي إللى وقع منه
عدد وعديد ما عديته
لاسباب الحنين جملة
لأوقات الغباء الفرط
لتحليل الوجع فينا
وتحويل الخطا ع الخط
لتزوير البطل سيما
لتزويق الحقوق بالشرط
إلى أصدق وزير كداب
عشان قال انه مش مسئول
إلى آخر بطل شعبي
مهللشي وعمل بهلول
لآخر مشهدين ف العرض
لآخر عرض اصبح طول
لآخر سكة مفتوحة
عشان اولها كان مقفول
لأول من صبح فاعل
لآخر من صبح مفعول
لأول كسر ف الجملة
وآخر نصب ف الإعراب
لأول ما اتمنع م الصرف
وشماعة عيشتنا هباب
لآخر خمسميت راحل من الاحباب
لناسي وأهلي ولبيتنا لغَلَق الباب
لناس حجت و لبتنا
خدوا ف قلوبنا لبتنا
وناس لو حجهم بيتنا
لا باتوا فينا ولا بيتنا
لآخر ضحكة ف التليفون
قفلنا بعدها بالغصب
لأول ساعة ف الوحدة
لأول عصرتين ف القلب
لبنت اتزوقت ليا
وزفوها لبيت غيري
لدمعي إللى اتحبس فيا
سنين بيشل تفكيري
لحلمى إللى اتسرق مني
وعايش لسه ف سريري
لجدي إللى مجاش زارني
عشان يقنعنى بغيابه
لتسبيحه إللى ع السبحه
وقلى كمله وسابه
لابويا طوّل الغيبة
مفكرشي يقول سلامات
بيسأل من بعيد لبعيد
واشوفه ف زحمة اللمات
قالولي باشبهك لكن
بأقول ان إللى خَلّف مات
لأول ست ف الدنيا
منزلتشي من الجنة
وآخر ست ف حياتى
رضاها الفرض والسنة
لأمي اللى اتّكيت فيها
اتكوت منى
زرعت الحزن ف عنيها
بتطرح فرح ف النني
المّ الفرح تضحكلي
وتطرح لما تحضنى
إلى مصر اللى مزروعة
ف قلبي عشقها استولى
باخش الجولة خسرانة
وباكسب لأجلها الجولة
بفهم فيها بالراحة
يا ست الكل مين أولى ؟!
أنا عايزك وطن يامه
ومش عايزك ف يوم دولة
لنفسي لو صحيح باقى
حاجات اهديها م المكتوب
لكام مرة قسيت فيها
وهى استحلفتنى أتوب
ضفرت الحلم جواها
وقلت إرضى وبالمركوب
لآخر مرة قابلتنى
وقررت أني أعيش أيوب
كلمات الشاعر
عماد مهران
Emad Mahran
Discussion about this post