حـد يـزعـل …

بقلم الشاعر …. عبدالحميد وهبه

حد يزعل من حبيبُه
ولاّ يقدر يوم يسيبُه
لو يفكر لحظة يبعد
غصب عنه الشوق يجيبّه
وإن بِعد يرجعله تانى
والحنين ياخده ف ثوانى
لو فى حُبه كان أنانى
ده اللى بس هيبقى عيبُه
حد يزعل من حبيبُه

حد يقدر ع البعاد
ولا يصبر ع السهاد
ده اللى بينى وبينه طبعاً
حب جه من غير ميعاد
لو فيه حد فينا فكّر
أنه يزعل مش هيقدر
وإن بعدنا ساعات مش أكتر
نلقى فيها الحب زاد

حد يهرب من مصيره
ولا فين هيلاقى غيره
لو شافونا الناس نقرب
كلهم على طول يغيروا
أه زعلنا ماكنش وارد
بس نرجع شوقنا زايد
ربنا عالم وشاهد
كل شخص بقى وضميره

بقلم الشاعر …. عبدالحميد وهبه