أرحـمـوا عـزيـز قـومـاً ذل …

بــقــلــم … نــورا عـــواجـــه

طبعاً دلوقتى الحديث ال مش بيخلص هو حديث الأسعار
وإذا كنا بنتكلم فى الموضوع ده من شهر قيراط فأحنا بنتكلم فيه دلوقتى 24 قيراط لأننا داخلين على شهر رمضان ..
والحقيقة الواحد مش لاقي كلام يعبر بيه عن المهزلة ال أغلبنا عايشها
وخصوصاً أولياء الأمور ، الآباء والأمهات المسؤولين عن أسرة وعوزين يكفوا إحتياجاتهم بأى شكل ومش عارفين . وحدث ولا حرج عن موقفه قدام أولاده وأهل بيته . وكسرته قدامهم أنه مش عارف يكفي حتى الضرورى.
وبما أنى ربة أسرة وأنا المسؤولة عن بيتى بحكم ظروفي الإجتماعية بقول ربنا يكون فى عون كل مسوؤل ..
الناس ال عندها دخل ثابت شهرياً يترواح مثلاً ما بين 3 أو 4 آلاف جنيه فى الشهر وملزم يدفع إيجار وميه ونور وغاز ودروس خصوصية وعلاج وأكل وشرب 30 يوم … يعنى 90 وجبة أكل بس .
ده غير أى طوارئ جهاز يعطل ،
سفر ضرورى ، حد يقع رجله أو إيده تتكسر ، حد عيان ومحتاج تحاليل أو إشاعات …( فمابالك بالناس ال معندهاش دخل أصلاً )اذن حدث ولا حرج …
إحنا فى مأساة وكارثه حقيقية . والمشكلة إنك كل ماتروح لأى بياع يقولك وكأنه شمتان فيك ولسه ياحجة الأسعار هتزيد كمان…
زمان كنا فاكرين إن الصدقة والزكاة للشحاتين ال بنشوفهم فى الإشارات
ال شعرهم منكوش وهدومهم مقطعة ..
دلوقتى الوضع إختلف . وكل ال بنشوفهم لابسين كويس أغلبهم بقي مستحق الصدقة .. لأنك لو دورت وراه هتلاقي جيبه مفيهوش غير تمن المواصلات وإنا لله وإنا اليه راجعون . الزكاة والصدقة دلوقتي مابقتش حاجه ينفع تتناقش .. في ناس لابسين كويس وشكلهم مش مبهدل عادي ، وراكبين جنبك في المواصلات ومش معاهم تمن وجبة حرفياً ، ولو معاهم ف تأكد إن اللي معاهم ده مش هيجيب وجبتين محترمين علي بعض ..
علشان كده دور ع اللي جنبك وشوفه ،، وال جنبك ده ممكن يكون جارك أو صديقك أو قريبك فى بلد تانيه دور على ال جنبك بقلبك وإحساسك ، و قبل كل ده بيقينك بالله إن الصدقه مش هتنقص من مالك بالعكس ده هيزيد …
طلع من فلوسك اللي ممكن تكون شايف إنها علي قدك بس ممكن الجزء اللي أنت شايفه بسيط ده وهيضيق عليك حاجه بسيطه أو هتضحي بسببه بخروجه ، معلش تعال علي نفسك اليومين دول ، ممكن يكون الجزء ده هيأكل راجل وأسرته ويكفيهم شر السؤال يومين تلاته ،
يا أهل الفضل بلاش أكل بره فى المطاعم الغالية . بلاش فسح .
بلاش مصايف السنه دى وأتبرع بتمن الرفاهيات دى لأرملة وعيالها الأيتام ، أو مطلقة وعيالها وأحميهم شر السؤال ..
بلاش عمرة ولاحج لو دى تانى أو تالت مرة وأتبرع بتمنهم لله .. دور على الناس المحتاجة ال بقوا كتيييييير قوى ، وأعطيهم مما أعطاك الله ، وتأكد أن ربنا هيعوضك ، وكلنا عارفين قصة (عبد الله بن المبارك) ال إتبرع بفلوس الحج لأرملة وبناتها لما شافها بتاكل من الزبالة وماسافرش ، ولما الناس ال كان مسافر معاهم رجعوا قالوله أنهم شافوه فى كل مكان فى مكه والمدينه كان بيدرس المسلمين
ربنا كتب له ثواب سبعين حجه وبشره بكده رسول الله صل الله عليه وسلم فى المنام ..
خلوا اليقين بالله أكبر من خوفنا من الفقر ربنا هو ال بيرزق مش رئيس الجمهورية ولا الوزير بس إحنا نتوكل على الله حق توكله .. ونقف جمب بعض .
قال رسول الله صل الله عليه وسلم
لو أنكم تتوكلون على الله حق توكله لرزقكم كما يرزق الطير تغدو خماصاً وتعود بطاناً ..
وقال كمان عليه أفضل الصلاة والسلام …
(مثل المؤمنين في توادهم وتراحمهم وتعاطفهم كمثل الجسد ، إذا إشتكى منه عضو تداعى له سائر الجسد بالسهر والحمى )

معرفش اللي إحنا فيه ده أخرته إيه أو هيتحل وهيخلص أمتي ، اليومين اللي إحنا فيهم أيام ما يعلم بيها إلا اللى خلقنا .. بس سبحانه وتعالى اكيد له حكمه أننا نعيشها
ربنا يرحمنا جميعاً ويقينا شر السؤال والحاجه ، وميكسرش أي بني آدم قدام أهل بيته …