نـقـول تـاني …

كلمات الشاعرة … ميمي محمود عبدالجليل

نقول تاني ..
اللي ميعرفش يقول ….
……..
اللي ميعرفش يقول ياااما
ويزوود في كلام وملامة
مهو شايفك بره الدوامة
ولا يعرف عنك غير اسمك
و لا شايف فيك غير لون رسمك
ولا حس الصبر ف ايامك
ولا شاف لياليك الشقيانة
م اللي ميعرفش يقول
ياااما

اللي ميعرفش بيتكلم
و يقول انا في الدنيا معلم
ولانك دايما متبسم
مش عارف انك متألم
و لا يعرف عن دنياك حاجة
ولا ضغط النفس المحتاجة
وجراحك علي بعض تسلم
م اللي ميعرفش
بيتكلم

اللي ميعرفش يقول يا ضعيف
ويقول طبعك لله.. يا لطيف
مهو شايفك ساكت ومسلم
سارح في الدنيا.. بتتعلم
ولا يعرف عن مشوار عمرك
ولا يومك عدي ف ليل سهرك
اهو حتي النوم ..بتنام تخاطيف
م اللي ميعرفش
يقول يا ضعيف

اللي ميعرفش يقول يا رقيق
ويقول م انتش محتاج لرفيق
مهو غايب عن حمل الماضي
شايفك مبسوط وكمان راضي
لا هو عشرة عمر عشان يعرف
ولا شافك م الدنيا بتقرف
ولا عاش ايامك وقت الضيق
م اللي ميعرفش يقول
يا رقيق

اللي ميعرفش يقول عادي
عايش تتهادي وبتهادي
ولا شفت الحزن يهد جبال
ولا ف الحسبان تفكير وعيال
ولا كتف اتحمل مر وداب
و لا شعر وشاب من وقت شباب
مسندش معايا الا ولادي
اللي ميعرفش يقول
عادي

اللي ميعرفش بلاش يعرف
خلي الموجوع ساكت اشرف
و ان مرة كلامه مجاش لهواك
اسمعه وارميه بره الشباك
وان قالك دنيا و ظلمتني
متردش وتقول طحنتني
قول ربك بعباده..الألطف
م اللي ميعرفش بلاش
يعرف

واهو اهلي واهلك قالوا زمان
الطيب عمره م يوم يتهان
ولا عمر عزيز النفس كريم
يحتاج ويمد الايد للئيم
و لا عمر ولاد الناس تنباع
ولا عمر كبير كان م الاتباع
خلي اللي يفكر بيفكر
وكفاية تكون عايش في أمان

م اللي ميعرفش
يقوووول…..
( عدس )

كلمات الشاعرة
ميمي محمود عبدالجليل