بقلم الشاعر … العابد عبد الرحيم
( لكل حبيب حبيب )
(زجل)
واه جدبي…….جدبي
واه جدبي…….رجعي
جذبي يا لالة لبنات
يا نوارة من نوارات.!
* يا من كُنْت في احضانو انبات.!
يا بحرية
يا حورية
يا هوى زارني او راح
بين اعشية و اصباح
خلف ف قلبي اجراح
يا ليل يا خليل
يا مسك الليل
يا شافي لغليل
يا لمهاجر ما ودعني
يا من غاب او خلاني.!
جدبي حقك فالدنيا
اجدبت قبلك بركاني
لاش امحيرة.؟
لاش امغيرة.؟
يا هموم الدنيا الدايزة
مولات الصبر ألفايزة
ياشرط العيشة الحارة
ليام ساعات غدا مارة
* عودِي الحالك يا من خلفتي خيالك.!
حرام عليك و احرام
يا من هزيتي ارحالك.!
خيالك ماشي ابحالك.!
هاذ الحال ما هو بالك.!
رجعي ارجوع النادمات
رجعي ارجوع التايبات.!
لبسيني احرير او موزون
لبسيني سبع ألوان ذهبية
لبسيني سبع ألوان فضية
لبسيني سبع اخواتم
نقشيني سبع نقشات
* نقشيني انقيش الحنة خضرة.!
ف ايدين…..بيضة ثامرة
السوالف اطويلة اسبيب
ديريني انحاس اوعلقيه
ديريني انحاس و لواني
* دار الزين قالوا ديما عامرة.!
رجعي أتحزمي افداركم
رجعي ا ترزمي ك العادة
درني عساس ايكون حارس
ايحرز الزين……فين ما كان
عنقيني سبع أَلْيالي بالشوق
انعنقك سبع انهارات بالعلالي
مالكم يا الغاديات.؟
رجعوا ارجوع الراجعات
انفرحوا فرح الماجيات
راه عرس العزبات راكَب.!
فينكم يا لعزارى الغايبين؟
جمعوا الزينة…….فالزهور
فين الوردات و السلام.؟
هزوا رايات مع اعلام.!
راها احمامة مع احمام.!
اهدية يا……طيبة لنفاس
خليتي العاشق بلا انعاس
واه جدبي….جدبي
جدبي يا لالة لبنات
فرحي للورد والزهرات
فرحي……فرحة لبنات
بقلم الشاعر العابد عبد الرحيم : 01/03/2021
Discussion about this post