أمــــــي …

كلمات الشاعرة … الأم لولو

عارفة ليه باشتاق إليكي
وابكي من بعدك حبيبتي
أيوة عايشة بس تايهة
شيء ناقصني هو إنتي
لما ألقى الكل عاوز
وافتكر كام مرة كنتي
توهبينا من سنينك
(عاوزة) دي عمرك ما قولتي
نبقى بنفكر في روحنا
ننسى نسأل حتى مالك
وإنتي بتداوي ف جروحنا
توهبي عمرك ومالك
تدعي وتهنّي ف فرحنا
وإحنا نقطف من جمالك
شِلتي ياما يا امّه عنا
مين بقى ف الشدة شالك
آه يا ريتني مُتت قبلك
آه يا غالية مشتقالك

لما بتعرض لشدة
وابقى محتاجة لدُعاكي
حضنك الطيب واحشني
نفسي يوم ارجع معاكي
نفسي أخدك جوا حضني
يبقى يوم قلبي رعاكي
يوم مافكرش ف مشاكلي
واسألك نفسك ف إيه
تضحكي وتقولي :تاكلي
وألا شايك تشربيه
ماتخفيش بعت الغويشة
واللي نفسك فيه هاتيه
بكرة هنكمّل جهازك
والفرح مقدور عليه

كنتي ليا كل حاجة
بس مارضيش الزمان
فرحة القلب بسذاجة
جوا حضنك والأمان
كله راح
كله راح وبكلمة واحدة
ماتت أمي
ماتت أمي وهي ساجدة
أمي ماتت
كلمة صعبة
شلت الروح واللسان
والدموع فاضت يا غالية
وإنتي بتفارقي المكان
شوفت حاجتك بس باهتة
حضن فارغ مـ الحنان
إنتي فعلا موتي يا أمه
وإلا دا كابوس الشيطان

كل شيء مشتاق لحسّك
حتى ريحتك ف الحيطان
لجل روحنا وهبتي نفسك
خدنا منك ياما ياما
والوجع لو مرة مسّك
تدعي لينا بالسلامة
اتوجعتي ما حد حسك
بس حسينا بندامة
كنا لسه محتاجينك
مين عليه فينا الملامة

ياللي عايش جنب أمك
بوس إيديها كل يوم
يوم سعادتك لو تضمك
تنسى وياها الهموم
هي نعمة هي جنة
ادعي ربك لك تدوم

كلمات الشاعرة
الأم لولو