باللّهجة الشعبية التونسية ورقة وقلم

كلمات الشاعرة … حسناء حفظونى

ياقلم حدّث عني الورقة
اكتب قصة غربتي والفرڨة
اكتبني حكاية طويلة
وايام زاهية كيف العسل عشناها
عليهم هانت والعمر ما ننساها

ياقلم حدّث عنّي الورقة
اكتبني حكاية غريبة
لا حملتها صفحات الكتب
ولا لعلّتها شفا في الطّب
سطّرني بحبار الآه يا قلم
سطرني بحبار الشّقا والهم
اكتب حكاية عاشقة مااتوب
غرّبتها الأيّام والمكتوب
خانها الدّهر والمحبوب

ياقلم حدّث عني الورقة
اكتب قصة غربتي والفرڨة
واحكيلها يا قلم على اشواڨي
وعلّي رحل من صحبتي ورفاڨي
وخلّى دموعي عالخدود سواڨي
سطّر من وجيعة ڨلبي كتاب
صفحة ندم وصفحة قهر وعذاب

يا ڨلم حدّث على بلادي الورڨة
قداش سرڨوا خيرها جهار ودرڨة
حبّر من دموع تونس لخضرا كتب
وكيفاش الخوانة لعبوا بيها لعب
لحبار ينشف وما يكفّيش غصة شعب

ياقلم لو تكتب على حلمنا الي راح
تفتح في قلوبنا جراح فوڨ أجراح
أكتب على ولادنا من حرقة لحرقة
الي ركب فلوكة والبحر كلاه
والي خدعوه والتّسفير بلاه
تبكي علينا المحبرة والورقة
وأكبر من حجم السطور الحُرڨة

يا ڨلم خبّر خوّان الوطن علينا
ڨلّهم تونس الغالية في عينينا
والي خانها محال يرجع يحكم فينا
يا قلم حدث عني الورقة
سطّر قصة غربتي والفرڨة

كلمات الشاعرة
حسناء حفظونى