صـرخـة ألـم …

كلمات الشاعر المهندس … إسماعيل منصور

.. مخنوق
الألم جوايا يصرخ
ها يموت من الخنقة
نفسه يتحرر
يخرج بره صدري
يمكن في يوم
يتحرر من السجن
ويطير في السما
بجناحين من الفرحة
.. خايف
تكون اللحظة حلم
يسقط
ويتحرم من الفرحة
.. نفسه
وصفه
في عيون الناس
يتغير
.. غيران
في راسه سؤال
ليه
عيون الناس بتلمع من الفرحة
ووقت الألم
القلب ينكسر
وعلي الخدين
تجري من عيون الحزين دمعة
.. حيران
بيسأل
ليه أنا الألم
بنفس الحروف
يتغير المعني
ألم
حروفه تتبدل
تصبح أمل
يصنع في الخيال أحلام
يعيش عليه الناس
مستبشرة ببكره
.. وأنا
ومن غير ذنب
حروفي
تصنع الحزن والحيرة
معايا تعيش الناس
خايفة من بكره
.. أنا الألم
بأصرخ
مين يسمع الصرخة

كلمات الشاعر المهندس
إسماعيل منصور