صفحة الدرويش …

كلمات … معوض حلمي شاعر عامية

شافت صورتي ع الصفحه
وانا باخد جايزتي ف همسه
لابــــس بدلتي والكاب
كأني أوروبي من النمسا
ماتعرفش إن انا فلاح
ومتأسس ف كام كتاب
باحارب فكـرة اللبلاب
وبافتح للطـيابه الباب
رامي حمولي ع الفتاح
وأي جــــراح باطيـبها
واداري عيوبها بالإحساس
على كتافي الغلق والفاس
وروحي مني طفشانه
وبانطق جيمي عطشانه
على الساحه باكون واجل
بعتت لي طلــب عاجـل
على صورة برنســـيسه
لأ والله كونتـــــــيسه
بحق الله ، باقولها يابيه
تقولش أميره بنت الإيه
مارووووووون جلاســيه
عيونها وساع ، ورمش دراع
ونظره إن عدوا ف سهامها
هاتهـــــزم جــــــــــيش
وخـد الـورد لو شـافه
يـروح مايجــــــــــيش
قولتـلها بـدون تجمـيل
ولا تذويق ، ولا ورنيـش
دخلتي صفحة الدرويش
هاتتـوضي ، وهاتسـمي
وتدخلي بس بشروطي
أنا همي ماهـوش همي
ولاطمعان ف طير غيري
حافظ خطوتي وسيري
واهـب ضحكتي لطيري
انا المعدول ومش عاجب
ماليش في القصه والحاجب
أنا حاجب شيطان الغي
ومانع إيده من لمسي
نصيحتي ليكي من نفسي
ولما انشر ومن حسي
تعـدي عليا وتمــسي
هاشوف شعري بيتمشى على الترعه
والآقي حروفي تتغندر
وتتـمايل بنات فـرعه
كمــــااااااان جـــرعه
لو الورده من إيدك على المنشور
بأيها لون ، هاكون ممنون
وهاكتب شعر م الموزون
وإن كنتي داخله تحتلي
وجوا سطوري تتسلي
وشوف أشعاري عدل لي
فانا آسف مانيش منهم
أنا غيرهم وبالعفه باتحنى
فابتمنى ، ياجبنه قريش
توفي بعهدي ماتخليش
وتدي الصـحبه أقـدارها
عشـان تهـدينا أنـوارهـا
وهانفش ريش ، عشان خاطرك
بحق المش متعتق ف كام بلاص
طلب الصداقة قبلته خلاص
فسمي بنية الإخلاص
وخطي باليمين بشويش
لكن إياكي ،
واوعاكي م الدخول ع الخاص
لو عايزه الصداقه تعيش
عشان خاطري
على حظرك
ماتجبرنيش
ـــــــــــــــــــــــــــــــــــــــــــــــــــــــــــــ
كلمات
معوض حلمي شاعر عامية