رفاقه للممات …

كلمات الشاعر … عبدالعزيز رياض
————–
شايف عمايلك ياوجع
حطيت رحالك فوق كتافي بالخدع
وكسرتني
هوَّ انت من كتر احتمالي للشقا
بتحبني
طب هوَّ حد يحب حد ويوجعه
طب هوَّ حد ان حب حد يقطعه
قلبي اللي غرقان في البكا
كان نفسه مرَّه تسمعه
كان نفسه مرَّه تهون عليك العشرة..
وتفارق بقى
طوِّلت ياصاحبي فِ أيام اللقا
وانا مش بَقيلي من حطام الدنيا شئ
غير الوهن والمنسأه
متشوقه روحي لحبة ضي
قبل الغرغرة
شيبي صبح ألبوم صور
فيه الجراح متبعتره
ياهلترى يادي الوجع
هتفك إيدي من إديك
أو حتى هصعب يوم عليك
فتقول خلاص
بكفايه مُرّ الذكريات
وكفايه مِ العمر اللي فات
واللا احنا ياصاحبي كده
هنعيش رفاقه للممااااات.

كلمات
الشاعر عبدالعزيز رياض