نهر الدموع …

كلمات الشاعرة … هيومة حمزة
……………..

لو حد فيكم فسر المكتوب
ولمح هنآك قلب متجرح
دموعه حارقه شامه ع الخدين
لا راضي يقول ولا يلمح
أبقوا أسألوا
نهر الدموع دى منين
و هاتوا له منديل ..
مايدوب بجمر العين.!!
ولا يجرح الرمشين..
و لموا بقايا القلب م الصفين….
أنا …أنا كان
هوايا زقزقه عصافير
والدمع كان رقرقه لايمين
طب أيه جرى….. خلاني أكون مسكين
أيه جرى… وحداني
أروح علي فين ؟
يمكن في قلب تعبته يوم بالنبض !
أو حتي دسته رغم شوق القلب
جايز ده تخليص حق
هي الحقيقه فين ؟؟
الحس تاه م الروح
ودواها مش لاقيين !
لو حد فيكم فسر المكتوب
لازم تشوفه العين
أبقوا أسألوني
فين فتات الحب
مفردش ليه سطوتة ع القلب
وفرشه بقش وخيش
قلبي نزف بشويش
كل الرؤي حاسدين
طب ليه وفين ولمين ؟؟
توهه وماليها حدود
وأنا زي كل الناس
مش زي صاحب الحوت
لما ضاق صدرة
سبح بصوت خاشع
( إني كنت ….من الظالمين )
و لا زي موسي يوم مافارقه الخضر .. بنى جدار يتيمين
ولا يوم ح أكون أيوب ..
أنا صبرى لو خلص راح أدوب
وأنا في الختام قلبي شبيه الفل
جرحه العذاب والمر
فازاي أكون عاشقة
وأنا روحي عايشة الذل
ف لو حد فيكم فسر المكتوب
أبقوا أسألوا نصيبي أصلا…
فين؟؟؟؟

كلمات الشاعرة
هيومة حمزة