شوية شِعر ….

كلمات الشاعرة … عفاف أحمد التركى

شوية شِعر من ااااخر مكان جوّاك..
محوّشهم عشان لو يوم تعوز تنساك..
تفرفطهم..علي هيئة كلام موزون..
وتعمل فيها شيخ مأذون..
تحط ايدين بنات بوحك..
في ايد روحك..
وتشهد ع الكتاب بحماس..
وتبارك بدون كلمات عموم الناس..
وتتفاجئ بيوم دٌخلتك دنيا..
.فتضرب لخمة او تحتاس..
صحيح ثوب الشعور بمقاس..
وتوب الفرحة متهلهل..
فكان ولابد ..تتأول..
في حلم البنت لو قطمت رغيف عيشها..
بانك دنيا هتعيشها ..
وياسلاام لو حلمها طوّل..
تتمنّي تعيده م الاول.. وتبقي معاك..
ومين كان مين في احلامُه ؟؟..
.ومين صلّي علي الحرمان..
ومين مانواش علي صيامه؟….
ومن فندّق بيبان قلبه..
وحط القِسمة..قُدّامه…؟..
ومين اللي ابتسم جدا..
ومن جوّاه مساحة ضيقة جدا..
وحبّة وشوشة وقمصة..
وحبّة عِند ومسايسة..
ومش مبسوط ومش زعلان؟؟..
كتير كانوا في كان ياما كان..
وكتير ما حكيتش حواديتهم..
فلو تقدر.. بكل مشاعرك..إبسطهم..
وخلّي الضحكة تتنطّط..
وتِخوِتهم..
وتكسر حاجز الاحزان…
وخّش الدنيا من بابها..
ومن شبّاكها.. والمنْور..
خّش بقلب ومغامر..
بلاش تدخلها تتمنظر..
ويُستحسن..تغمّي عينيك..
وتربط احزمة قلبك.. واوجاعك..
اخدت العمر بتفّكر في اقلاعك..
وقد حان الهبوط الآن..
لأول مرة هترستق قدم..ع الارض..
فهات م السُنة..شرح الفرض..
وحُط الطول في دايرة عرض..
واتوّكل..
ما اجمل نعمة النسيان.
…………………………………….
كلمات الشاعرة
عفاف أحمد التركى