مين اللى فرّق شملنا … ؟

كلمات … الشاعر الغنائى / طه علي الدين

مش كنتى دايبة فيا دُوب ؟
و بتوحشينى و بوحشك لو فات يا دوب
يومين تلاتة ماشفتكيش؟
و ف كام رسالة تبعتى( مش عارفة أعيش)
من غيرى مش حاسة الحياه
من غيرى مش شايفة الوجود؟
و انا أد منك نار و آه
و لولا منعانى الحدود
أنا كنت آجايلك
لو ماشيلك
و ألف درعاتى فى حضنك و أشيلك
و أحس بالطفل اللى فيا
لما اللى فيا يشتكيلك
و أحلف و انا عينى فى عينيكى
إنى عمرى فى غُربتى مالقيت بديلك
و مهما شوفت من بنات
عينى ما شافتشي إلا غيرك
و بإبتسامتك تتضحكى بقوة و ثبات
عارفة إنك جوة قلبى واحدة غير كل البنات
و تفرشيلى رموش عينيكى
و أخش أبات
ليه الشتات؟
مين اللى فرق شملنا؟
و مين فى صالحه بُعدنا؟
صحيح بعدتنا الظروف..
و لا تقصير مننا؟
لو ع الظروف ياما الظروف وقفت لعشاق زينا
لكن أكيد مش زينا
هما داسوا على الظروف
سكنوا عش.. سكنوا روف
هما أمنوا بحبهم.. عاشوا حلمهم
و إحنا علقنا الظروف فوق الرفوف
و فوق شماعة حلمنا
لما بقينا ناس شبهنا
لا انتى إنتى.. و انا مش انا
كل اللى باقى مننا..
يا دوب شوية ذكريات مع إسمنا

كلمات
الشاعر الغنائى / طه علي الدين