كاسَك يا حِلو …

بقلم الشاعرة … كاتيا سلامي

بْهالعيدْ شْرِبْتْ كاسَكْ
يا حِلو…….
يَلّي بِالعِشْقْ وِالهَوى
قَلْبي فيكْ مْدَلَّلو……..
وْمَعْ كِلْ رَشْفِةْ كاسْ
وْدَقِّةْ كاسْ
حَسَّيْتْ بْغَرامي بَعْدو بْأوَّلو……
وْبْكِلْ حُب شْرِبْتْ كاسَكْ
يا حِلو……..

حَطَّيتْ كاسْ الغَرامْ
بْرِقَّة وْغِنْجْ عَلى شْفافي ….
وْنَظْرِةْ عْيونَكْ إلي تِشْتِكي
وْتِحْرُق أنفاسي …….
وْشو حِلو السِّكْرْ
لَمّا كاسَكْ ضَرَبْ كاسي….
وْلَمّا إيدَكْ دَقِّتْ بِأيدي
وْسَرْقِتْ كِلْ إحساسي ….
وْبْكِل حُبْ قِلْتِلَّكْ كاسَكْ
يا حِلو…….

مَلّي كاسي بِالغَرامْ
وْقَلْبي إلَكْ بْحَلِّلو ……
وْما بِرضى بْلَحْظِةْ سِكْرْ
حُبَّكْ إلي تِغْزِلو…..
خَلّي قَلْبَكْ أبْيَضْ
بِبَياضْ التَلْجْ مْكَلَّلو……
مِتْلْ كاسَكْ بْنَوايا العِشْقْ
وِالصِدْقْ مْجَمَّلو
خَلّي السَهَرْ يِرْسُمْ صُوَر
بْكاسْ وْناسْ
وْكِلْ عيدْ وْغَرامَك إلي
بَعْدو بْأَوَّلو….
وْبْكِلْ حُبّ شْرِبِتْ كاسَكْ
يا حِلو…………

يِنعاد عالجميع بالخير والصحّة والفرح…
أحد ومرفع مبارك أصدقائي…

بقلم الشاعرة كاتيا سلامي
كاسك ياحلو

٢٠٢٣/٢/١٩