كلمات الشاعرة … شيماء ابوسمرة
انا ماعشقتش اصلا نبى
وانا عارفه الكمال لله
قالولى ذنبى انا فمطلبى
الاقى حبيبى واتمناه
كنسخة معجزة فى الود
مانيش طالبة عمر فالعدل
ولاصبرى كما ايوب
ولا هاستنى توبة لذنب
انا طلبى ماهوش معيوب …
هكمل بس ترتيلى لآية جوة سوره النسا
وايه يعنى ما تعشقنى
انا عشقى ماهوش معجزة !!
وحط ضميرك الغايب
مخاطب …اكتفيت غربه
دة رب الكون مجمعنا ..
فماتزيدش القلوب كربة ..
ماهيش صعبة … ودين الله
انا باحبى
عشان اوصل لفلك بنيته فبحورك
قسمت الناس مابين قلبى
وقلبى اللى وهبتولك
مانيش سيباك انا بطولك ف عرض اليم
جنون العظمة خبيته بقيت لى اهم
مشارف بلدتى بانت … فمين ف جيوشك العاصى
فحارب بس ورينى ….
فحتى لو هزمتك شوق
هتبقى آسير وفوق راسى…!!
ولو ناسى فنون الحرب …
كفاية نظرة منك ضرب
بسهم ماليته حنيتك ….
انا فالحرب حبيتك
فمابالك بحضن سلام…
وحتى ضربتى فمقتل …
بقيت اعقل …واقول ياغرام
فانصافك لحبى حياة …
ورزقك اللى جاى م السما
وقلبى تبقى يوم مولاه
جوارى عيونى بيك مغرمة
كما الكليوباترا ليلة برد…
وهاعتبر الجبين مخلوق عشان اكتب مابينا الوعد
ياطير السعد صحيلى فى ضحك الخلق
ف طفلى الاول البكرى …بيحمى الطلق….
ولحظة الميلاد …جبروت
ومن جبروتى خليته بيعشقنى ب امر الله …
Discussion about this post