مش عدالة …

كلمات الشاعرة …. حنان شاهين

مش عدالة
إني ٱجي الدنيا و امشي
بدون ما أسيب في الكون أثر
قلب فاني في دنيا فانية
زي ملايين البشر
مش عدالة
أبقى حاجة روحي سكر
جوا مشروب الامل
والقى عمري كله فات
زي كاس فجأة انكسر
مش عدالة
إن بعد الليل ما ليل اكتشف
اني عشت بادور في دايرة
جوا دايرة
دايرة ساحبة روحي مني
في بير غويط
شايفة جوا البير ضحية
سامعة جوا البير عياط
وقفوا كل الساعات
لسه ما بلتش ريقي
لسه ما شبعتش حياة
لسه عايزة فرصة تانية
أبقى فيها بهيئة تانية
ابقى روح حرة و خفيفة
مش جسد مربوط بصخرة
صخرة سدة كل حارة
و كل شارع
ماشية طول الوقت خايفة
شايفة طول الوقت غول
غول وراي بيطاردني
غول سابقني و غول راصدني
و غول بسن سنانه ليا لما اموت
شايفة شجرة توت هناك
عايزة اشرب من عسلها
و كل دول مانعني افوت