إن زلزلة الساعة شيء عظيم …

بــقلــم … نـــورا عـــواجــــه

نايمين فى أمان الله فجأة صحينا على خبر زلزال هد الدنيا فى سوريا وتركيا . 30 ثانيه قلبت رأس العالم على عقب .
30 ثانيه ضاعت معها أرواح وبيوت وأحلام ،
طبعا ال محسش بالزلزال ده وربنا نجاه . دلوقتى واخد الأمور بشكل عادى وممكن يهزر كمان أنا محستش . طب عيدوا تانى . هو أنا كيس جوافه ولا إيه .
وهذا إن دل فإنما يدل على كارثة حقيقية فى الدين أولاً .
كلنا مبتلون وكان ممكن يكون حد فينا إحنا المصريين أو أى حد من أى بلد تانيه شهيد أو تحت الأنقاض لحد دلوقتى .
محدش سأل نفسه ياترى لو كنت ميت أو تحت الأنقاض حالى كان هيبقي إيه ؟!
إحنا هنموت سواء بزلزال أو على السرير ، هنموت دلوقتى أو كمان شويه..المشكله لمانموت هنموت على أى حال ؟! وياتري أيه الحال بعد 30 ثانيه دول ؟!
ال سرق وال ظلم وال أكل مال اليتيم . وال أخد حق أخواته .
ال أتهم الناس بالباطل وأتكلم عنهم وخاض فى أعراضهم من غير دليل ..
حالكم إيه بعد 30 ثانيه دول ؟!
ال زور أوراق علشان يورث حق مش حقه وال شهد زور ودخل ناس بريئه السجن بسببه .
ال بيخزن السلع علشان تمنها يبقي 5 أضعاف وبعدين يبيعها من غير رحمه .. ال رمى أولاده ومش بيصرف عليهم ولا يعرف عنهم حاجه..ال بيغش فى السلع علشان يكسب ملايين على حساب صحة الناس ..
ال وعد بنات الناس بالجواز بإسم الحب وأستغل عواطفها . وبعدين هددها بحجة أنها واحدة شمال وتستاهل ..حالكم إيه بعد 30 ثانيه دول ؟!
الناس ال كل همها فى الدنيا التنمر والتريقه على خلق الله . وال بسببهم ناس بتنتحر وتتدمر نفسياً ،
ال بيعطل مصالح الناس علشان ياخد رشوى وال … وال …وال
مفكروتش أن ال حصل فى سوريا وتركيا ده ممكن يحصل معاك ياترى هتقول لربنا أيه..
وأيه حالكم بعد ال 30 ثانيه دول ؟!
هذا هو الحال بزلزال أرضي .

فكيف بزلزل قيام الساعة
أذكر نفسي وإياكم بقول الحق سبحانه وتعالى

《يَا أَيُّهَا النَّاسُ اتَّقُوا رَبَّكُمْ ۚ إِنَّ زَلْزَلَةَ السَّاعَةِ شَيْءٌ عَظِيمٌ》
لو ماحسيتش بالزلزال أو ساكن في مكان بعيد عن مكان الزلزال ….تأكد أن زلزلة القيامة هتوصلك في مكانك وشدة الزلزال ده مش هتتقاس أصلا على مقياس ريختر .
والنجاة الوحيدة ليك في زلزال القيامة ده …لازم تعملها من دلوقتي ..لما ترجع لربنا وتعيد حساباتك مع ربنا ونفسك والناس …

الزلازل من آيات الله اللي بيخوف بيها عباده .. عشان يتوبوا ويرجعوا قبل مايجيلهم الزلزال الأخير { وَمَا نُرْسِلُ بِالْآيَاتِ إِلَّا تَخْوِيفًا }
لو ماتوبتش ومافوقتش دلوقتي هتتوب وتفوق أمتى ؟!

كان ممكن جداً تكون واحد من اللي ناموا بالليل وهم عندهم أحلام كتير … وكان الزلزال ده نهاية كل أحلامهم .
إحنا فين من ربنا ..
(ألم يأن للذين آمنوا أن تخشع قلوبهم لذكر الله ومانزل من الحق )…
سيدنا عمر بن الخطاب قال
يبدو أن الأرض تتهيأ لأمر لا يعلمه إلا الله..
فخذوا حذركم فالموت يأتي بغتة …
ربنا يرحم ال مات ويصبر أهلهم وذويهم ويربط على قلوبهم ، ويحمى ال تحت الأنقاض ، ويحسن ختامنا
والسلام…