صمت العيون ….

كلمات الشاعرة …عزة أحمد ابوزيد ابوزيد

صمت العيون ليه يجرحك
بيزيد في قلبك م آلاهات
رغم الدموع دي بتمسحك
والقلب ينبش في الي فات
شاكك ف حيرتي وف عذابي
ولا جرحي من الوجع ؟
نبض الحياة لو كان يهون
للعمر ينفع مرتجع
نزف الحروف خبّيه وداريه
ما بين عيون شايفاك حزين
واعمل لقلبك ندر دين
لما تحلوّ السنين
إياك تصدق اي كلمة
تتقال بتلعب ..
بالعقول
ولا حبة طبطبة
زي ضحك على الدقون
خيط الحقيقة أوّله ..
صعب المنال
والصبر لو نتحمّله
ده مافيش محال
تحلا الحياة
وألف آه
من قلب ماتت ضحكته
ناقص حياة
جرح السنين لو تعرفه
وتقرّبه
وف لحظة تقدر تعرضه
شوف العجب
الزيف وباين في الوشوش
صديق بيضرب بالقلم
في الوشّ بيبان لك نبي
في الضهر يغلب ع الوحوش
في الدنيا خدت كام قلم
بقيت اخبّي علّتي
بقيت باخبّي جوه نفسي
دمعي وحزني و قهرتي
فاضل لي إيه يادنيا تاني
مرميّة ليه في سكتي
باضحك أوى
وعيوني ماليها الدموع
باكدب أوى وانا جوه دمعاتي
باجوع
لكلمة حلوة
تروي قلبي من العطش
يمكن لحبّة طبطبة
انا طفلةعايشة
جوة حالي
خايفة اموت من غير رجوع
خايفة أنسى بسمتي
نفسي بجد .. احسّها
لونها نسيته وطعمها
سنين ألم
ولسة عايشة ف عزها
طول عمرى ضهري
كان قوي
وكان يشيل م الكوم حمول
دلوقتي قرّب يستوي
يتمني يرجع الزمن
باتمني لو لحظة رجوع